Veigar Páll: Kemur mér ekkert á óvart að hann kaupi Aron Elís

Víkingar staðfestu sölu á miðjumanninum Aroni Elís Þrándarsyni til norska úrvalsdeildarliðsins Álasunds í morgun, en samkvæmt heimildum Vísis borgar það í heildina 30 milljónir króna fyrir Víkinginn.

Þjálfari Álasunds er Svíinn Jan Anders Jönsson sem áður hefur þjálfað Landskrona í heimalandinu og Stabæk og stórlið Rosenborg í Noregi.

Hann var þjálfari Stabæk á árunum 2005-2010, en á þeim tíma kom hann liðinu upp úr B-deildinni og gerði það að norskum meisturum árið 2008. Stabæk hafnaði í einum af þremur efstu sætum deildarinnar 2007-2009 undir hans stjórn.

Aðalmennirnir í liðinu var sóknarparið DanielNannskog og Veigar Páll Gunnarsson sem blómstraði undir stjórn Jönsson. Veigar Páll er talinn einn besti erlendi leikmaðurinn sem spilað hefur í Noregi, og segist hann eiga Jönsson mikið að þakka.

Spilar rosalegan flottan fótbolta

„Hann gerði heilmikið fyrir mig. Ég átti mjög erfitt til að byrja með þegar ég fór til Stabæk 2004 (áður en Jönsson tók við). Ég var meiddur og gekk hrikalega illa. Ég var jafnvel að spá í að hætta í atvinnumennsku strax eftir fyrsta tímabilið því ég var svo langt niðri,“ segir Veigar, en svo kom Janne, eins og hann kallar Jönsson.

„Janne sá mig á æfingum og í leikjum eftir tímabilið og lætur mig strax vita að ég er týpan sem hann var að leita að. Ég gaf þessu því annað tækifæri og undir hans stjórn gekk allt alveg hrikalega vel. Mér leið vel undir hans stjórn.“

„Hann hentaði mér rosalega vel sem þjálfari og hann er ástæðan fyrir því að ég hélt áfram og ég sé ekki eftir því. Hann er þannig týpa að manni líður vel í kringum hann og það er auðvelt að tala við hann. Janne leggur mikið upp úr því að byggja upp sjálfstraust hjá mönnum og hvetur þá hrikalega mikið.“

Stabæk-liðið var eitt það alskemmtilegasta í norsku úrvalsdeildinni undir stjórn Jönsson og léku Nannskog og Veigar Páll sér oft að varnarmönnum andstæðinganna. Svíinn vill spila skemmtilegan fótbolta, segir Veigar.

„Hann er með ákveðna aðferð sem ég mun koma til með að notfæra mér ef ég verð einhverntíma þjálfari. Hún er rosalega flott, en vissulega örlítið brothætt. Ef hún virkar má búast samt við rosalega skemmtilegum fótbolta. Engu að síður vorum við traustir varnarlega. Hann er bara virkilega klókur þjálfari.“

Vera áfram auðmjúkur

Aron Elís, líkt og Veigar Páll sumarið 2003 þegar hann sló svo rækilega í gegn, hefur verið einn af bestu leikmönnum deildarinnar og þá spila þeir sömu stöðu. Kaup Álasunds á Víkingnum koma Veigari því ekkert á óvart.

„Þetta kemur alls ekkert á óvart. Jönsson lítur á þessa stöðu sem Aron Elís spilar og ég gerði þegar ég var upp á mitt besta sem þá mikilvægustu í sóknarleiknum. Hann vill fá sérstakar týpur til að spila hana og kaupir ekki bara hvern sem er þó hann sé eitthvað nafn og hafi staðið sig vel hér eða þar. Aron er búinn að vera alveg magnaður á þessu tímabili þannig þetta kemur mér ekkert á óvart. Hann er þessi týpa sem spilar í holunni sem þjálfarinn vill hafa í sínu liði,“ segir hann.

Þó Veigar Páll hafi verið stórstjarna á Íslandi og síðar í Noregi þá hljóp hann á vegg á sínu fyrsta tímabili eins og hann viðurkennir sjálfur. Hvað er það sem Aron Elís þarf að hafa í huga þegar hann fer út?

„Aðalatriðið er að hann má ekki ofmeta norska knattspyrnu. Fyrst hann er að standa sig svona vel hérna þá veit ég að hann mun standa sig úti ef hann heldur áfram á sömu braut. Hann verður bara að vera áfram auðmjúkur og þolinmóður,“ segir Veigar Páll Gunnarsson.