Óskar eftir stuðningi Framsóknarflokksins við vantrauststillögu

Ákvörðun þingflokks Pírata að leggja fram vantrauststillögu á innanríkisráðherra kemur ekki á óvart, enda hafa óformlegar viðræður staðið yfir undanfarnar vikur milli stjórnarandstöðuflokkanna um að leggja fram slíka tillögu.

Birgitta Jónsdóttir, þingmaður Pírata, segir viðbrögð innanríkisráðherra við þeirri ákvörðun ríkissaksóknara að ákæra aðstoðarmann hennar vera ólíðandi.

„Þetta er búið að skapa ótrúverðugleika og vantraust í garð stjórnsýslunnar, eitthvað sem við megum ekki við sem þjóð. Það er nú þegar það mikið vantraust gagnvart okkur sem sitjum á Alþingi, að við megum bara ekki við þessu og auðvitað væri eðlilegast ef hún myndi víkja, að minnsta kosti þar til þetta mál er til lykta leitt,“ segir Birgitta.

Hún segir ljóst að ef innanríkisráðherra hefði komið fram af hreinskilni í upphafi, þá væri hún ekki í þeirri stöðu sem hún er í í dag.

„Nú á að gera þetta þannig, að það á bara að einblína á einn og einn þátt málsins. En ef maður skoðar þetta heildstætt, er alveg augljóst að þessi aðili er rúinn trausti og ekkert annað í boði en að lýsa vantrausti,“ segir Birgitta.

Ertu bjartsýn á að þingmenn Framsóknarflokksins komi til með að styðja þessa tillögu?

„Maður hefur fundið fyrir því að mörgum í Framsóknarflokknum finnist þetta mál óþægilegt. En það þarf ákveðið hugrekki, og kannski búa einhverjir þingmenn Framsóknarflokksins yfir þannig hugrekki að þeir geti látið hjartað ráða för,“ segir Birgitta.

Hún reiknar með að tillagan verði tekin fyrir á fyrstu dögum þingsins í september. Samkvæmt heimildum fréttastofu hafa bæði þingmenn Samfylkingarinnar og Vinstri grænna, rætt sín á milli um að leggja fram vantrausttillögu á innanríkisráðherra.

Guðmundur Steingrímsson, formaður Bjartrar framtíðar, sagði í samtali við fréttastofu að tillagan komi ekki á óvart í ljósi atburða síðustu daga. Þingflokkur flokksins hafi þó ekki tekið afstöðu til þess hvort þeir muni styðja hana.

Katrín Jakobsdóttir, formaður Vinstri grænna, tekur í sama streng, en hún hafi heyrt af umræðum um slíka tillögu hjá þingmönnum annarra flokka. Þá sagði Árni Páll Árnason, formaður Samfylkingarinnar, á fésbókarsíðu sinni í gær, að mál innanríkisráðherra sé afsagnarsök fyrir ráðherra í öllum lýðræðisríkjum.