„Fundum boltann sem Kjartan Henry skaut yfir úr vítinu fljótandi við Hrísey“

Jóhann Helgi Hannesson sendi Kjartani Henry Finnbogasyni kaldar kveðjur á samskiptasíðunni Twitter í gærkvöldi eftir 2-0 sigur Þórs á KR í Pepsi-deildinni.

Þór vann óvæntan sigur á Íslandsmeisturunum með tveimur glæsilegum mörkum og var sigurinn fyllilega verðskuldaður.

Kjartan Henry fékk færi til þess að minnka muninn undir lok leiksins þegar dæmd var vítaspyrna á Orra Sigurjónsson. Kjartani brást hins vegar bogalistin og fór vítið hátt yfir markið.

Jóhann Helgi grínaðist með það á Twitter að hann hefði fundið boltann við sjóstangveiði rétt fyrir utan Hrísey en tíst Jóhanns má sjá hér fyrir neðan.

Fórum í sjóstöng eftir leik og fundum boltann sem Kjartan Henry skaut yfir úr vítinu fljótandi við Hrísey #kemur pic.twitter.com/g5mFXRGNLm

— Jóhann Hannesson (@JohannHelgi9) July 10, 2014