Zekovic á útleið hjá Fylki

Sadmir Zekovic hefur líklega spilað sinn síðasta leik fyrir Fylki en framherjinn komst ekki í hóp liðsins fyrir leikinn gegn Fram í kvöld.

Zekovic er einn þriggja erlendra leikmanna sem komu til Fylkis fyrir tímabilið en fyrir nokkru var Ryan Maduro sendur heim. Andrew Sousa var hins vegar í byrjunarliðinu í 2-0 sigri Árbæinga í kvöld.

„Zekovic komst ekki í hópinn í kvöld. Við sjáum ekki eins og staðan er nú að hann muni spila meira fyrir okkur,“ sagði Ásmundur Arnarsson, þjálfari Fylkis, eftir leikinn.

„Það er svo ekkert í hendi með að fá nýja leikmenn í glugganum. Við erum að skoða það og vonandi getum við náð 1-2 öflugum leikmönnum inn.“