Sérstakur saksóknari ber vitni í skaðabótamáli Pálma í Fons

Ólafur Þór Hauksson, sérstakur saksóknari, þarf að bera vitni í skaðabótamáli Pálma Haraldssonar, eða Pálma í Fons, gegn Glitni.

Héraðsdómur Reykjavíkur kvað upp úrskurð í gær þess efnis. Pálmi heldur því fram að slitastjórn Glitnis hafi valdið honum tjóni þegar honum, og níu öðrum, var stefnt fyrir rétt í New York í Bandaríkjunum árið 2011. Byggir hann á því að málsóknin hafi verið ólögmæt. Málið var á endanum flutt hér á landi en með því skilyrði að stefnendur væru sáttir við það.

Ásakar Pálmi embætti sérstaks saksóknara um að hafa unnið með slitastjórninni við undirbúning málsóknarinnar í New York. Segir í úrskurði sem fréttastofa hefur í höndum að Pálmi byggi á því að „tilgangur umræddra aðgerða hafi verið að koma honum á kné.“

Af þessum ástæðum vill hann leiða Ólaf Þór Hauksson til vitnis, til þess að hann geti borið um hvernig samstarfinu var háttað í tengslum við málsóknina. Vísar Pálmi í sjónvarpsviðtal við ráðgjafa embættis sérstaks saksóknara þar sem hann telur að komi fram að samvinna hafi verið með aðilum.

Sérstakur saksóknari  hefur hafnað því að embættið hafi haft nokkra aðkomu að ákvörðun slitastjórnarinnar um málsókn.

Samkvæmt íslenskum réttarfarsreglum þurfa embættismenn á borð við sérstakan saksóknara ekki að bera vitni ef þeir geta lagt fram opinbert skjal með upplýsingum um það sem þeir eru krafðir vitnisburðar. Sérstakur saksóknari lagði fram bréfasamskipti milli sín og lögmanns slitastjórnarinnar. Dómurinn hafnaði því að skjölin gerðu það að verkum að Ólafur gæti neitað að bera vitni.