„Mér finnst háalvarlegt að fólk virði ekki umferðarlögin. Þetta er bara glannaskapur,“ segir Dagný Annasdóttir, skólastjóri Melaskóla. Myndband gengur nú um netheima sem sýnir flutningabíl frá Mjólkursamsölunni bakka útaf skólalóð Melaskóla og eru nokkur börn í kringum bílinn. Eitt foreldri, sem virðist vera að fylgja barni sínu í skólann, lemur í bílinn.

Ríkisútvarpið vakti athygli á myndbandinu sem má sjá hér að neðan.

„Við höfum áður haft samband við MS og lýst yfir óánægju okkar með að bílnum sé lagt þarna. Við gerum okkur grein fyrir að aðkoman að skólanum er erfið en við biðjum þá um að bíllinn sé ekki þarna þegar börn eru að koma í skólann eða eru í frímínútum,“ segir Dagný.

Hún segir ánægjulegt að foreldrar séu á verðbergi. „Vonandi verður þetta til þess að þetta gerist ekki aftur. Það er gott að vita af því að foreldrar fylgist vel með, eins og þessi sem tekur myndbandið. Í skólanum okkar eru um 600 börn og ég vil nota tækifærið til þess að hvetja alla til þess að fara varlega í kringum skólann.“

„Þetta gerðist líka í síðustu viku og ég kvartaði þá. Í gær fékk ég þau svör að búið væri að tala við bílstjórann,“ segir Sigurður Jónas Eggertsson, sem tók myndbandið. „Þetta kom líka upp um vorið 2013 og þá var haft samband við þá og það lagaðist strax.“

„Meðan börnin eru að koma í skólann og í frímínútum á ekki að vera vörumóttaka þarna. Vörurnar fara inn í eldhúsið á skólalóðinni og þetta er óþægileg aðkoma fyrir bílstjóra, en það er óafsakanlegt að þeir séu að koma með vörur á þessum tíma. Þegar börnin eru öll að koma til skóla,“ segir Sigurður.