Jóhann Þórhallsson óvænt í byrjunarliði Þórs

Jóhann Þórhallsson, framherjinn stóri og stæðilegi í röðum Þórsara, er í byrjunarliðinu sem mætir Stjörnunni á Þórsvellinum í 4. umferð Pepsi-deild karla í knattspyrnu klukkan 17.00.

Jóhann gaf það út fyrir tímabilið að hann væri hættur en hann spilaði þrjá leiki með liðinu í Kjarnafæðismótinu og einn í Lengjubikarnum 20. febrúar. Síðan þá hefur hann ekki klæðst Þórsbúningnum.

Páll Viðar Gíslason, þjálfari Þórs, er í vandræðum með framlínuna því bandaríski framherjinn Chukwudi Chijindu er enn frá vegna meiðsla og spilar ekki í dag.

Þórður Birgisson hefur ekki byrjað mótið nægilega vel en hann var tekinn af velli í hálfleik gegn Fram í síðustu umferð. Í heildina hefur Þór aðeins skorað tvö mörk í fyrstu þremur umferðunum en bæði mörkin setti Ármann Pétur Ævarsson.

Þór er á botni deildarinnar, án stiga eftir þrjár umferðir og er því vonandi fyrir norðanmenn að Jóhann geti komið þeim til aðstoðar.