Hvítasti kálfur landsins boðinn upp

Einn hvítasti kálfur landsins er nýkomin í heiminn á bænum Læk í Flóahreppi. Kálfurinn hefur fengið nafnið Hvíti Gauti þrátt fyrir að hann sé kvíga. Nafnið er til heiðurs Gauta Gunnarssyni bónda á Læk sem lést fyrir stuttu úr krabbameini. Kvígan verður boðin upp og mun ágóðinn renna til nýstofnaðar göngudeildar sjúkrahússins á Selfossi.

Á Læk er rekið myndarlegt kúabú en hvíti kálfurinn sem kom í heiminn fyrir mánuði er þar í stíunni sinni og unir hag sínum vel. Hann fær stundum að koma á fóðurganginn þar sem Gísli Gautason gefur honum mjólk úr pela.  Kvígan hefur fengið nafnið Hvíti Gauti til heiðurs Gauta Gunnarssyni, bónda á Læk, sem lést síðasta haust úr krabbameini aðeins 43 ára gamall. Saman áttu þau Guðbjörg Jónsdóttir fjögur börn.Kálfurinn er mikill gleðigjafi á Læk.

„Já, hann er mjög sérstakur þessi kálfur, alhvítur og það á nú ekki að vera hægt með íslenska kúakynið að það fæðist hvítir kálfar, alhvítir“, segir Guðbjörg aðspurð um lit kálfsins.

En hvað verður um kálfinn ?

„Það er ætlunin að bjóða hann upp á Sunnlenska sveitadeginum, sem verður á laugardaginn á Selfossi. Ágóðinn fer til Sjúkrahúss Suðurlands og það er gaman að segja frá því að á sama tíma og kálfurinn fæddist þá var ákveðið að stofna nýja deild fyrir krabbameinssjúka og gigtarsjúklinga á sjúkrahúsinu, þannig að ágóðinn munn renna í aðbúnað og umhverfi þeirra deildar,“ bætir Guðbjörg við.

Eftir uppboðið á laugardaginn verður Hvíti Gauti fluttur í húsdýragarðinn í Reykjavík þar sem hann framtíðarheimili hans verður.

„Já, það er ánægjulegt að húsdýragarðurinn hefur tekið vel í það að hann verði þar til sýnis en Gauti starfaði sem dýrahirðir í garðinum,“segir Guðbjörg.