Ógnvaldur í undirdjúpunum horfir til Íslands

Svo virðist sem kóngakrabbi sé farinn að huga að landnámi við Íslandsstrendur. Kóngakrabbi er mikill vágestur og skilur eftir sviðna jörð þar sem hann fer um sjávarbotninn.

Áhöfnin á Sigurði Ólafssyni SF 44 veiddi í vikunni kóngakrabba í humartroll í Breiðamerkurdýpi. Þetta er fyrsti kóngakrabbinn sem veiðist við Íslandsstrendur svo vitað sé, segir Jónas P. Jónasson sérfræðingur hjá Hafrannsóknarstofnun Íslands.

„Jú, það ku vera rétt. Þetta er fyrsta eintakið sem finnst við Ísland. Við vitum af nokkrum eintökum sem hafa veiðst rétt norður af Bergen en aðallega er hann bundinn við svæði mjög norðarlega, norðan Tromsö, þannig að það er langt í næsta fundarstað.“

Mikill vágestur

Jónas segir að þetta gæti orðið áhyggjuefni sé litið til framtíðar. Koma verði í ljós hvort annað eintak skjóti upp kollinum. Náttúruverndarráð Noregs vill að kóngakrabbar verði álitin umhverfisógn en ekki nytjategund og að veiðar á þeim verði auknar til þess að koma í veg fyrir frekari útbreiðslu. Krabbinn er mesti vargur og leggst til dæmis á síldar- og loðnuhrogn. Þurfa Íslendingar að hafa af þessu þungar áhyggjur?

„Þetta eru alveg nýjar fréttir fyrir okkur. En, það er alveg rétt, í Noregi hafa menn haft áhyggjur af útbreiðslu þessa krabba við norðurströnd Noregs. Og sunnan vissrar línu eru veiðar alveg frjálsar. Og menn reyna að hefta útbreiðslu þessarar tegundar suður. En, svo má líka benda á það að nyrst í Noregi eru stundaðar nokkuð arðbærar veiðar á þessari tegund. Þetta er arðsöm veiðitegund en vissulega kemur hann til með að hafa gríðarleg áhrif á allt botndýralíf þar sem hann nær fótfestu.“

Skilur eftir sig sviðna jörð

Kóngakrabbinn skilur eftir sig sviðna jörð þar sem hann hefur farið um sjávarbotninn.

„Já, væntanlega... svona stórt dýr þarf töluverðan lífmassa til að halda sér á lífi og sér til viðurværis. Hann kemur til með að hafa veruleg áhrif á botndýrafánu þar sem hann fer um.“

Kóngakrabbinn getur orðið mjög stór, þeir allra stærstu ná allt að tveggja metra faðmstærð eða á milli klóa. Kóngakrabbar voru settir út af Rússum við strendur Kólaskaga við Norður-Noreg á árunum 1960-1970 en menn vildu sjá til með það hvort hann mundi ná að stækka og síðan ætluðu menn að veiða hann til matar. Þannig að þið fylgist vel með?

„Já, við fylgjumst auðvitað með og komum til með að kanna þetta, fylgjast vel með hjá sjómönnum hvað er að gerast og einnig í okkar leiðöngrum, hvort við sjáum fleiri dýr af þessari tegund.“