Á ofsahraða á Selfossi

Lögreglan á Selfossi stöðvaði ungan ökumann á Hellisheiði í nótt eftir að bíll hans hafði mælst á 132 kílómetra hraða. Hann hlýtur þunga sekt fyrir.

Þá var annar ungur ökumaður stöðvaður upp úr miðnætti, við að reykspóla í hringi á bílastæðinu við Bónus, austast í Selfossbæ.

Að sögn lögreglunnar á Selfossi er það árvisst að ökumenn sletti úr klaufunum þegar þeir skynja vorið og hagi sér eins og kálfar á vordegi. Þeir kunni sér hins vegar ekki læti þegar þeim er sleppt út úr fjósunum eftir vetrardvöl þar.