Brutu rúður við Hallgrímskirkju

Vegfarandi nokkur kom að tveimur piltum við Hallgrímskirkju um klukkan hálftíu í gærkvöldi sem höfðu brotið tvær rúður í skutbíl og voru að setja varning í plastpoka. Þegar piltarnir urðu mannsins varir hlupu þeir á brott.

Í tilkynningu frá lögreglu segir að maðurinn hafi þá veitt piltunum eftirför í átt að Snorrabraut og á flóttanum köstuðu þeir því frá sér sem þeir höfðu stolið úr bílnum. Umráðamaður bílsins fékk það til baka sem stolið hafði verið en situr uppi með skemmdirnar á bíl sínum. Piltarnir eru enn ófundnir en þarna var um töluverð verðmæti að ræða.

Að öðru leyti virðist nóttin hafa verið nokkuð róleg hjá lögreglu að því frátöldu að níu ökumenn voru stöðvaðir vegna aksturs undir áhrifum víðsvegar um borgina.