Laugardalslaug lokað vegna óláta

Laugardalslaug var lokað í um fimmtán mínútur á laugardaginn var vegna óláta ungra manna sem voru gestir í lauginni. Nokkrir hafa haft samband við fréttastofu vegna þess en þeim þótti óljóst hvað gerst hefði.

Gestum sundlaugarinnar var tilkynnt í gegnum hátalarakerfi laugarinnar að sundlaugaverðir treystu sér ekki til að tryggja öryggi þeirra og voru þeir beðnir um að fara upp úr lauginni. 

„Það voru nokkrir ungir menn með ólæti. Þeir voru að hoppa út í laugina þar sem fólk var að synda sem dæmi og að stífla rennibrautina. Það getur verið stórhættulegt og ollið örkumli fyrir þann sem lendir á einhverjum sem er stopp,“ segir Logi Sigurfinnsson, forstöðumaður sundlaugarinnar.

„Þeir voru síðan með almennt virðingarleysi og hlýddu engum fyrirmælum.“

Lögreglan var kölluð til og ræddi við mennina.

„Svona hefur aldrei gerst áður og þetta er alveg ömurlegt, bæði fyrir sundlaugaverðina og aðra gesti laugarinnar,“ segir Logi. „Hér var full laug af fólki sem var að njóta góða veðursins og friðsældarinnar. Það er ekki skrítið að fólk sem ekki sá hvað var í gangi hafi orðið hissa.“

Farið hefur verið yfir málið og segir Logi öryggisverðina hafa brugðist hárrétt við. „Við erum með reglur um fjölda starfsmanna sem þurfa að vera til taks og kunna skyndihjálp.“

Gestir laugarinnar brugðist flestir vel við. Einhverjir voru ósáttir og var þeim boðið að koma aftur í sund sér að kostnaðarlausu. „Ef fleiri eru ósáttir geta þeir komið og fengið frítt ofan í,“ segir Logi.

„Okkur þykir leiðinlegt að hafa þurft að gera þetta. En eftir að hafa farið yfir málið þá er ekki annað hægt en að hrósa sundlaugavörðunum.“