Tjónið gæti verið 40 til 50 milljónir

Kennslustofurnar sem brunnu við Rimaskóla í dag voru í eigu Svifflugfélags Íslands. „Við keyptum þær í fyrra og ætlunin var að flytja þær upp á Sandskeið,“ segir Kristján Sveinbjörnsson, formaður félagsins. Kennslustofurnar voru í nokkrum samtengdum húsum.

Félagið fékk hins vegar ekki leyfi til þess að flytja húsin upp á Sandskeið. Fjögur sveitarfélög hafa deilt um eignarrétt á Sandskeiði. Eitt þeirra bæjarfélaga er Kópavogur sem neitaði félaginu að færa húsin á svæðið. Reykjavík og Mosfellsbær svörðu aldrei beiðninni að sögn Kristján en Seltjarnarnes gaf heimild.

Tjónið vegna kennslustofanna segir Kristján vera um 4o til 50 miljónir króna eða það sé endurbyggingarverðið. Hann óttast að fá ekkert úr tryggingunum því lögin séu þannig að aðeins skuli bæta kostnað vegna endurbyggingu. En Svifflugfélagið fái ekki að byggja húsin upp aftur við Rimaskóla. „Það er að minnsta kosti óljóst með bætur,“ segir hann.

Ekki sáttur verið meðferð málsins

Tjónið geti því orðið mjög tilfinnanlegt fyrir félagið. „Ef búið hefði verið að flytja húsin værum við í allt annarri stöðum,“ segir Kristján.

Hann er ekki sáttur við þá meðferð sem félagið hefur fengið vegna flutninganna. Vegagerðin sem nú sé Samgöngustofa hafi synjað um flutning. Það hafi verið kært til Innanríkisráðuneytisins sem staðfesti ákvörðun Vegagerðarinnar. Þá var farið til Umboðsmanns Alþingis sem gerði alvarlegar athugasemdir við meðferð málsins. Innanríkisráðuneytið hafi því ætlað að taka málið til meðferðar á nýjan leik. Úr því hafði hins vegar enn ekki orðið.