Íslandsbanki ekki sett íbúum afarkosti

Íslandsbanki hefur með engu móti sett íbúum Hafnar né forsvarsmönnum öldrunarmiðstöðvarinnar afarkosti eins og ýjað hefur verið að í fjölmiðlum, enda er félagið ekki í vanskilum við bankann. Þetta kemur fram í tilkynningu frá bankanum.

RÚV fjallaði um málið um helgina en þar kom fram að íbúar Hafnar þyrftu að reiða fram allt að fjórar milljónir króna á næstu vikum til að fá að búa áfram í húsum sínum. Ástæðan er taprekstur byggingasjóðs Hafnar sem rekur húsin. Gæti Íslandsbanki leyst húsin til sín myndu íbúar ekki reiða fram milljónirnar eins og sagði í fréttinni.

Tilkynningu Íslandsbanka má sjá í heild sinni hér að neðan:

Vegna frétta um málefni öldrunarmiðstöðvarinnar Hafnar í Hafnarfirði vill Íslandsbanki árétta eftirfarandi.

 

Bankinn tjáir sig almennt ekki um málefni einstakra viðskiptavina en í ljósi framsetningar í  fréttum um málið hefur Öldrunarmiðstöðin Höfn veitt bankanum leyfi til að koma eftirfarandi  upplýsingum á framfæri.

 

Öldrunarmiðstöðin  Höfn leitaði til Íslandsbanka um aðstoð vegna fjárhagsörðugleika sem félagið glímir við og hefur aðkoma bankans að málinu því fyrst og fremst  tengst mögulegum lausnum á fjárhagsvanda þess. Í því felst meðal annars að Íslandsbanki hefur veitt félaginu vilyrði fyrir því að aðstoða við fjármögnun mögulegrar lánveitingar þess til íbúa Hafnar ef á þarf að halda.