Átakafundur hjá eldri borgurum

Mikill átakafundur var hjá Félagi eldri borgara í Reykjavík í gær. Athygli vekur að á fundinum kom fram vantrauststillaga á stjórn félagsins, sem byggir á óánægju með að Sigurði Einarssyni formanni félagsins, var nýverið sagt upp störfum, en fundarstjóri lagði hana ekki fyrir fundinn.

„Já, hann mat það svoleiðis. Ég hef fengið lögfræðing til að kíkja á það og ég held að þetta hafi verið rétt metið hjá fundarstjóra. Ekki var rétt að leggja hana fram því ekki var hægt að reikna með því að fram kæmi svo róttæk tillaga. En, það var „absalút“ meirihluti fyrir því í salnum að lýsa yfir vantrausti á stjórnina,“ segir Sigurður Einarsson í samtali við Vísi.

Þórunn H. Sveinbjörnsdóttir, stjórnarformaður Félags eldri borgara (FEB), segist í samtali við mbl.is ekki telja að þessi vantrauststillaga komi á dagskrá. Hún vísar til þess að uppsagnir séu óhjákvæmilegar þegar fjárhagurinn þrengist og ekkert sé í lögum nema örfárra stéttarfélaga þess efnis að tilgreina þurfi ástæður fyrir uppsögn. „Þetta er stormur í vatnsglasi,“ segir Þórunn.

Sitt sýnist hverjum um hvort þetta sé stormur í vatnsglasi. Sigurður hefur áður sagt að fjárhagur félagsins hafi ekki versnað undir sinni stjórn, fjárhagur félagsins sé með ágætum – hann telur þetta fyrirslátt – og þarna ráði persónuleg óvild og önnur atriði för. Í fréttatilkynningu sem hann og stuðningsmenn hans sendu út fyrir fundinn segir: „Búast má við átökum á fundinum þar sem mörgum félagsmönnum er heitt í hamsi vegna ruddafenginnar og siðlausrar framkomu stjórnar Félags eldri borgara í Reykjavík gagnvart framkvæmdastjóra félagsins, sem hefur ekkert til saka unnið og þjónað félaginu og félagsmönnum vel á starfstíma sínum, undanfarin tæp 8 ár.“

Hvað varðar næstu skref segir Sigurður hóp í kringum sig og þau þar muni nú ráða sínum ráðum. „Þetta voru mikil átök á fundinum í gær og best að láta þau líða. Ég get ekkert sagt um það á þessari stundu,“ segir Sigurður. Ólíklegt verður að teljast að málinu sé lokið.