Þakklát stjórnvöldum fyrir að hlusta

„Það hefur verið tekið tillit til flestra okkar tillagna. Af hálfu bandalagsins voru ákveðin atriði gefin eftir, við gáfum smá afslátt að aðgengi fyrir fólk í hjólastól,“ segir Ellen Calmon, formaður Öryrkjabandalags Íslands.

Í umhverfis- og auðlindaráðuneytinu hefur verið undirrituð breyting á byggingarreglugerð og lýtur breytingin einna helst að ákvæðum reglugerðarinnar  um markmið og algilda hönnun. Miðar breytingin fyrst og fremst að því að auka sveigjanleika við gerð íbúðarhúsnæðis.

Reglugerðin var sett árið 2010 í henni og byggði hún að hluta til á breyttri hugmyndafræði, svokallaðri algildri hönnun. Samkvæmt hugmyndafræðinni er þess krafist að við hönnun mannvirkja sé frá upphafi tekið mið af þörfum allra, þar á meðal fatlaðra og þeirra sem búa við skerta hreyfigetu.

Samtök iðnaðarins kváðu reglugerðina gera húsnæði dýrara og óvistvænna. Reglurnar yrði til þess að dragast myndi úr byggingaframkvæmdum og hefðum í íslenskri byggingalist yrði eytt. Einnig myndu lán hækka.

Síðasta sumar skoraði Öryrkjabandalagið á stjórnvöld að fara ekki út í vanhugsaðar breytingar á reglugerðinni og sagði útreikninga Samtaka iðnaðarins vegna breytinga á nýrri reglugerð ekki standast.

Mikilvægt að ekki verði frekari skerðingar

„Í lögum um mannvirki er skýrt kveðið á um að fara eigi eftir viðmiðunum um algilda hönnun, sem þýðir aðgengi fyrir alla,“ segir Ellen.

Öryrkjabandalagið og Sjálfsbjörg, landssamband fatlaðra sendu inn athugasemdir nú í febrúar  vegna breytinga á reglugerðinni. Þau lögðu meðal annars áherslu á að í byggingareglugerð yrði skýrt kveðið á um að snúningsflötur fyrir fólk í hjólastól yrði óbreyttur.

Ellen segir þau að flestu leyti ánægð með reglugerðina en mikilvægt sé að ekki verði frekari skerðingar á snúningsfleti. Í minnstu íbúðunum sé nú aðeins heimsóknaraðgengi fyrir fólk í hjólastól en ekki aðgengi fyrir þau að búa þar.

„Við erum afskaplega ánægð með þetta og þakklát stjórnvöldum fyrir að hlusta á okkur,“ segir Ellen.