Ferðum Wow air fækkar enn frekar

Wow air hefur fækkað ferðum til Kaupmannahafnar, Mílanó og Zurich um eina í viku vegna breytinga á flugflota sínum. Til stóð að flugfélagið hefði fimm þotur á sínum snærum í sumar en þeim fækkaði um eina þegar fallið var frá áformum um flug til Bandaríkjanna. Þá þurfti einnig að hætta við flug Wow air til Stokkhólms. Svanhvít Friðriksdóttir upplýsingafulltrúi félagsins staðfestir þetta við vefsíðuna Túrista.

Í viðtali við Markaðinn í byrjun febrúar sagði Skúli Mogensen forstjóri Wow air að breytingarnar hefðu áhrif á um 7.000 farþega sem þegar höfðu keypt miða í þessar ferðir félagsins.

Að sögn Svanhvítar voru 1.200 af þessum farþegum á leið til og frá Stokkhólmi. Hún segir að búið sé að ganga frá málum langflestra farþega sem urðu fyrir áhrifum af þessum breytingum og fólk hafi sýnt málinu skilning.