Samkeppniseftirlitið sendir Skarphéðni tóninn

 „Samkeppniseftirlitið [telur] mikilvægt að opinber umræða um mikilvæg samkeppnismál fari fram á grundvelli réttra forsendna." Svona endar nýútgefin yfirlýsing Samkeppniseftirlitsins, en orðunum er beint að Skarphéðni Berg Steinarssyni, fyrrverandi forstjóra Iceland Express.

Samkeppniseftirlitið segir Skarphéðin Berg Steinarsson tjá sig um mál Wow Air og Isavia á röngum forsendum og að hann sé í ósamræmi við sjálfan sig með ummælum sínum við fjölmiðla.

Skarphéðinn sagði í samtali við fréttavefinn Túristi.is seinasta föstudag að Isavia væri ekki þekkt fyrir að standa vörð um hagsmuni Icelandair. Auk þess sagði Skarphéðinn „Iceland Express ekki átt í neinum vandkvæðum með að sinna flugi til Boston og New York árið 2011 á sama tíma og Wow Air fékk úthlutað, eða kl 17:50." Ummæli Skarphéðins voru svar við ummælum Skúla Mogensen, forstjóra Wow Air, sem sagði meðal annars að Isavia hefði gerst sekt um að „vernda hagsmuni og einokun Icelandair."

Samkeppniseftirlitið hefur vegna ummæla Skarphéðins séð tilefni til að senda frá sér yfirlýsingu þar sem Skarphéðni er sendur tónninn. Í yfirlýsingunni er því haldið fram að þessi ummæli Skarphéðins standist ekki skoðun. Yfirlýsingin er rökstudd á þennan hátt:

„Af þessu tilefni er rétt að fram komi að á þeim tíma sem Skarphéðinn vísar til hafði Samkeppniseftirlitið til meðferðar kvörtun frá Iceland Express þar sem félagið kvartaði undan alvarlegum samkeppnishindrunum sem stöfuðu af úthlutun flugafgreiðslutíma á Keflavíkurflugvelli. Í júní 2012, þegar Skarphéðinn var framkvæmdastjóri Iceland Express, barst Samkeppniseftirlitinu bréf frá félaginu þar sem fram kemur það mat að fyrirkomulag Isavia við úthlutun afgreiðslutíma hafi haft veruleg útilokunaráhrif fyrir Iceland Express og viðhéldi yfirburðarstöðu Icelandair í áætlunarflugi til og frá Íslandi. Einnig er vísað til þess að Isavia hafi með fyrirkomulaginu veitt Icelandair samkeppnisforskot og „einkarétt“ á bestu afgreiðslutímum á flugvellinum. Hafi Iceland Express m.a. þurft að hætta áætlunarflugi til Bandaríkjanna sem það hafði starfrækt árin 2010 og 2011."

Í ljósi þessa eigi ummæli Skarphéðins um að úthlutun á brottfarartímum hafi ekki haft neikvæð áhrif á Iceland Express ekki við rök að styðjast að mati Samkeppniseftirlitsins.