Wow Air fær ekki forgang að afgreiðslutímum

Úrskurður Samkeppniseftirlitsins um að Isavia skyldi gert að veita Wow Air forgang að afgreiðslutímum á Keflavíkurflugvelli hefur verið felldur úr gildi. Þetta kemur fram í úrskurði Áfrýjunarnefndar samkeppnismála sem var kveðinn upp í dag.

Wow Air hafði krafist þess að Isavia myndi veita þeim forgang að afgreiðslutímum á Keflavíkurflugvelli. Samkvæmt úrskurði áfrýjunarnefndarinnar var kröfu þess efnis ranglega beint að Isavia, sem hefur samkvæmt úrskurðinum enga heimild til að taka ákvarðanir um slíkt.

Wow Air getur því ekki beint kröfum sínum um úthlutun afgreiðslutíma að Isavia né Icelandair.

Í úrskurðinum er tekið undir sjónarmið Isavia og Icelandair sem hafa haldið því fram að Isavia hafi enga heimild til að skipta sér af úthlutun afgreiðslutíma á flugvellinum. Slíkt sé alfarið á ábyrgð óháðs samræmingarstjóra sem starfar eftir alþjóðlegum úthlutunarreglum og hefur sjálfstætt stjórnsýsluvald samkvæmt íslenskum lögum.

Segir Samkeppniseftirlitið hafa hlaupið á sig

Úrskurðurinn er í samræmi við orð samræmingarstjórans á Keflavíkurflugvelli, Frank Holton, sem hefur haldið því fram að Samkeppniseftirlitið hafi hlaupið á sig með fyrri úrskurði sínum. „Samræmingarstjóri skal einn bera ábyrgð á úthlutun afgreiðslutíma," sagði Holton í samtali við fréttastofu þann 8. febrúar síðastliðinn.

Þá segir meðal annars um fyrri úrskurð Samkeppniseftirlitsins: „Slík niðurstaða væri í fullu ósamræmi við fyrrgreind ákvæði reglugerðar nr. 1050/2008 [um úthlutun afgreiðslutíma á Keflavíkurflugvelli innsk. blm.] og þau ákvæði evrópskra reglugerða sem hér hafa verið rakin.“

Í úrskurðinum kemur fram að Wow Air leitaði ekki til samræmingarnefndar afgreiðslutíma á Keflavíkurflugvelli til að fá úrlausn í málinu, eins og þeim hefði verið í lófa lagið að gera samkvæmt 13. gr. reglugerðarinnar.