Harma að Wow air sjái sér ekki fært að efna til samkeppni

„Við hörmum að WOW Air sjái sér ekki fært að efna til aukinnar samkeppni og nýta afgreiðslutíma sem félaginu voru úthlutaðir í samræmi við viðurkenndar aðferðir í starfsemi flugfélaga og flugvalla á alþjóðavísu. Isavia kýs ekki að eiga í deilum við viðskiptavini sína en bent skal á að ekki er hægt að úthluta sama afgreiðslutíma tvisvar,“ segir Björn Óli Hauksson forstjóri Isavia í yfirlýsingu sem Isavia sendi frá sér rétt í þessu.

Björn Óli segir Isavia þegar hafa ráðist í stækkun flugstöðvarmannvirkja á Keflavíkurflugvelli svo mæta megi aukinni eftirspurn.

„Gert er ráð fyrir að fyrsti áfangi verði tekinn í notkun á næsta ári. Misskilningur er að ríkið komi að fjármögnun framkvæmda á Keflavíkurflugvelli. Notendur greiða,“ segir Björn.

Skúli Mogsensen forstjóri Wow air sagði í samtali við Markaðinn í dag að Isavia hafi með þessu máli sýnt af sér vanhæfni í máli sem snýr að úthlutun komu- og brottfaratíma á Leifsstöð og með því að bregðast ekki við vanda Leifsstöðvar sem hann segir of litla til að geta tekið á móti öllum þeim ferðamönnum sem vilja koma til landsins.

Isavia segir úthlutun afgreiðslutíma á flugvöllum fara eftir samræmdum evrópskum reglum sem lögfestar eru hérlendis. Óháður aðili annist úthlutun og samræmir afgreiðslutíma á upphafs- og endastöð hvers flugs. Isavia komi þannig ekki að úthlutun afgreiðslutíma og getur ekki haft afskipti af störfum samræmingarstjóra, enda er það óheimilt samkvæmt reglum.

Isavia annast rekstur og uppbyggingu Keflavíkurfugvallar. Í yfirlýsingunni segir að eitt af helstu markmiðum í starfi félagsins sé að auka tíðni, og þar með samkeppni, í áætlunarflugi til og frá landinu. Til þess að ýta undir fjölgun flugleiða bjóði Isavia tímabundinn afslátt af lendingargjöldum samkvæmt sérsniðnu hvatakerfi.

„Starfsmenn félagsins hafa undanfarin ár fundað með fjölmörgum  flugfélögum til þess að kynna þjónustu flugvallarins og Ísland sem áfangastað. Markaðsstarfs félagsins hefur meðal annars skilað sér með þeim hætti að nú halda 17 flugfélög uppi áætlunarflugi til Íslands yfir sumarmánuðina og fimm til sex flugfélög allt árið. Til samanburðar voru fyrir 10 árum einungis sjö flugfélög með tímabundna áætlun og aðeins tvö með áætlun allt árið. Fullyrðingar um að Isavia stuðli ekki að samkeppni í áætlunarflugi eiga því ekki við rök að styðjast," segir í yfirlýsingunni.

Isavia segir næga afgreiðslutíma í boði á Keflavíkurflugvelli utan einnar og hálfrar klukkustundar að morgni og síðdegis.

„Fjöldi flugfélaga sem geta fengið úthlutað afgreiðslutíma á þessum tveimur háannatímum takmarkast af stærð flugstöðvarinnar og fjölda flugvélastæða við hana. Góður árangur hefur náðst í að auka nýtingu flugstöðvarinnar með dreifðri notkun. Frekari stækkun til aukinnar afkastagetu er mjög kostnaðarsöm,“ segir ennfremur í yfirlýsingu Isavia.

Isavia segir Wow air ekki hafa nýtt sér samkeppnisákvæði í reglugerð um úthlutun afgreiðslutíma á flugvöllum veitir nýjum aðilum á tiltekinni flugleið forgang að helmingi nýrra og lausra afgreiðslutíma.

„Isavia hefur áfrýjað ákvörðun Samkeppniseftirlitsins um að félaginu beri að hlutast til um störf óháðs samræmingarstjóra. Félagið telur ákvörðunina vera óeðlilegt inngrip í samræmdar EES-reglur og til þess fallin að skaðað samkeppni í flugi til og frá landinu og kunni að letja erlend flugfélög sökum þess að Samkeppniseftirlitið hygli flugfélögum á heimaflugvelli,“ segir að lokum í yfirlýsingunni.