Sveik 25 manns um miða á Króatíuleikinn

Karlmaður á þrítugsaldri á hefur verið ákærður fyrir fjársvik, fjárdrátt og umboðssvik en hann þóttist hafa miða til sölu á fyrri umspilsleik Íslands og Króatíu um laust sæti á HM í nóvember. Maðurinn er búsettur á Akureyri en fréttastofa RÚV greindi fyrst frá þessu í hádeginu í dag.

Playstation tölvur, iPhone símar og miðar á landsleiki er meðal þess sem 26 ára karlmaður notaði til þess að hafa fé af fólki á samskiptamiðlinum Bland.is. Vísir hefur kæruna undir höndum.

Mál á hendur manninum var þingfest í Héraðsdómi Norðurlands Eystra þann 6. mars. Rúv greindi frá því fyrr í dag.

Meint brot mannsins eiga öll að hafa átt sér stað á árinu 2013 og urðu fimmtán einstaklingar eða fyrirtæki fyrir barðinu á honum.

Fjórir reyndu í örvæntingu að kaupa miða á landsleik Íslands og Króatíu í nóvember. Uppselt varð á leikinn á örfáum klukkustundum en miðasalan var umdeild en hún hófst að næturlagi.

Seldi maðurinn miðana á bilinu 17-26 þúsund krónur. Í öllum tilvikum fékk hann fólkið til að leggja inn á sig peningana eftir samskipti á Blandinu en aldrei bárust miðar eins og lofaði hafði verið.

Þá reyndu tveir að kaupa iPhone síma af manninum, sömuleiðis töldu tveir sig hafa keypt hlýja úlpu og einnig lögðu tveir til viðbótar inn á hann fjárhæð til að tryggja sér Playstation leikjatölvu. Aldrei barst varan sem greitt hafði verið fyrir. Dýrasta einstaka millifærslan var 50 þúsund krónur fyrir snjallsíma.

Þá tókst manninum að hafa 16 þúsund krónur af kommóðukaupanda og 30 þúsund krónur af netverja í leit að hjólbörðum. Þá gisti hann í tvær nætur á hóteli á Akureyri þegar hann hafði bókað fjögurra nótta gistingu. Að loknum tveimur nóttum laumaðist hann útaf hótelinu án þess að greiða fyrir þjónustuna.

Öll ofan talin mál, fjórtán samanlagt, teljast til fjársvika.

Maðurinn er einnig ákærður fyrir fjárdrátt og umboðssvik gagnvart konu á fimmtugsaldri. Aðstoðaði hann hana við innkaup og útréttingar vegna veikinda hennar, tók út úr hraðbönkum, keypti sér símainneignir og millifærði af reikningi hennar yfir á reikninga kunningja sinna. Þeir hafi síðar afhent honum peningana. Auk þess tók hann 85 þúsund króna lán hjá smálánafyrirtækjunum 1909 ehf. og Hraðpeningum án hennar samþykkis með því að nota tölvupóstfang hennar.

Heildarupphæðin, sem manninum er gefið að sök að hafa svikið út úr fólkinu, er rúmlega 830 þúsund krónur.