Íbúar áreittir, eggjum kastað og kveikt í spegli

Hópur drengja hefur valdið íbúum í Vallahverfinu í Hafnarfirði skaða og ónæði undanfarin kvöld. Íbúar hafa fengið egg og snjóbolta í glugga sína og í einni bílageymslu hefur verið kveikti í spegli. Einn íbúi í hverfinu hefur haft samband við lögreglu og skólayfirvöld vegna málsins.

Ítrekað áreiti

„Svalirnar mínar virðast vera eitthvað skotmark hjá þeim,“ segir íbúi í hverfinu sem vill ekki láta nafn síns getið til þess að forðast viðbrögð drengjanna.

„Þeir hafa kastað snjóboltum og eggjum í gluggana hjá mér einhver kvöld í röð. Ég fór út á svalir og stóð þá að verki, eitt skiptið. Þá köstuðu þeir bara snjóboltum í átt að mér og ég þurfti að hörfa,“ segir íbúinn.

Hann segir mikil óþægindi hljótast af þessum ólátum – sérstaklega af eggjakastinu. „Maður er með eggjaskurn um allar svalir og ógeð út um allt. Þetta er óþolandi,“ segir maðurinn.

Hafði samband við lögreglu

Maðurinn er búinn að hafa samband við skólastjórnendur Hraunvallaskóla, sem er skóli drengjanna, og lögreglu vegna málsins. „Ég hef komist að nöfnum tveggja drengjanna og hafði samband við lögreglu og skólann. Ég vil að þetta fari réttar boðleiðir. Skólastjórnendur ætla að gefa frá sér yfirlýsingu vegna málsins og ræða við nemendur um þetta. Svona hegðun líðst ekki.“

Maðurinn hefur heyrt frá fleiri íbúum í hverfinu sem hafa svipaða sögu að segja. „Þeir eru að kasta í glugga hjá fólki, bæði snjóboltum og eggjum. Þeir eru á ferðinni frá níu á kvöldin til að verða hálf ellefu,“ útskýrir maðurin.

Kveikt í spegli

Vísir hafði samband við konu sem býr í hverfinu. Í bílakjallara í blokkinni sem hún býr í hefur verið kveikt í spegli.

„Þetta var fyrir nokkrum dögum. Ég veit ekkert hvort þetta séu nákvæmlega sömu strákarnir, en ég efast allavega um að einhver fullorðinn hafi gert þetta,“ útskýrir konan og heldur áfram:

„Einhver hefur farið inn í bílakjallarann og kveikt í þessum spegli. Hann er notaður til öryggis, svo maður sjái bíla sem koma úr gagnstæðri átt.“

Þurfti að taka dyrabjölluna úr sambandi

Konan hefur lent í meira ónæði. „Já, ég hef lent mikið í því að einhverjir hafa verið að gera dyraat hjá mér. Þetta var orðið svo mikið að ég ákvað bara að taka dyrabjölluna mína úr sambandi,“ segir konan.