Tóku ekki mark á skiltunum

Vegagerðarmenn komu tveimur ungum konum til hjálpar um átta leitið í morgun eftir að þær höfðu  setið í föstum bíl sínum á Öxnadalsheiði síðan klukkan hálf fjögur í nótt, í myrkri og illviðri.

Þær höfðu bílinn í gangi til að halda á sér hita og amaði ekkert að þeim nema leiðindi. Þær  styttu sér þó stundir með þvi að vera í símasambandi við lögregluna á Akureyri af og til.

Þær voru búnar að vera í fjórar og hálfa klukkstund í föstum bílnum þegar Vegagerðarmennirnir komu loks á vettvang, en för þeirra sóttist fremur hægt þar sem veður var vont á heiðinni, hvasst,  skafrenningur og slæmt skyggni.

Heiðin var rækilega merkt lokuð, eftir að hún varð ófær í gærkvöldi, en stúlkurnar óku framhjá skiltunum án þess að taka mark á þeim. Þær sögðu við lögreglu í morgun að þær væru búnar að læra sína lexíu og myndu farmvegis fara að öllum leiðbeiningum og virða skilti Vegagerðarinnar.

Ljósi punkturinn í þessu öllu væri að þeim hafi gefist gott tækifæri til að styrkja vináttuböndin, einar í myrkrinu og hríðinni.