Sektaður fyrir húfuna

Ólafur Stefánsson, fyrrverandi landsliðsfyrirliði í handbolta og þjálfari karlaliðs Vals, mætti á mótmælin á Austurvelli í dag eins og margir aðrir til að láta í ljós óánægju sína með slit aðildarviðræðna við ESB.

Ólafur var tekinn tali í kvöldfréttum Stöðvar 2. Viðtalið í heild sinni má sjá í spilaranum að ofan.

Athygli vakti að Ólafur var með húfu með mynd af Köngulóarmanninum þegar fréttamaður tók viðtal við hann. Samkvæmt heimildum Vísis notar Ólafur húfuna mikið þessa dagana og varð hún meðal annars þess valdandi að hann hlaut sekt í sektarsjóði meistaraflokks Vals þegar hann mætti með hana á æfingu.

Þetta staðfestir Guðmundur Hólmar Helgason, fyrirliði Vals í samtali við Vísi.

„Já það getur passað að við höfum sektað hann fyrir að mæta með þessa Spiderman húfu á æfingu,“ segir Guðmundur.

Þetta er ekki í fyrsta skipti sem Ólafur ber húfu sem vekur athygli. Á verðlaunaafhendingunni á EM í handbolta 2010 í Austurríki mætti Ólafur með hvíta húfu sem minnti einna helst á kollhúfu.

Húfan var upphaflega í eigu austurríska tónlistarmannsins DJ Ötzi sem flutti lagið Sweet Caroline en lagið var mikið spilað og setti svip sinn á EM 2010.

„Þetta snýst ekkert endilega um það hvort maður sé fylgjandi Evrópusambandsaðild eða ekki, þetta snýst um að standa við orð sín,“ sagði Ólafur Stefánsson í viðtali við Stöð 2 í dag.

„Það er ekki endalaust hægt að svíkja kosningaloforð og halda síðan að maður komist upp með það.“