Ráðherra því miður með utanáliggjandi æxlunarfæri

Magnús Ragnarsson, aðstoðarmaður menntamálaráðherra, er óænægður með að Illugi Gunnarsson hafi ekki veitt verðlaun á Edduhátíðinni, uppskeruhátíð íslensku kvikmynda- og sjónvarpsakademíunnar, sem haldin var síðastliðin laugardag. Konur kynntu og veittu öll verðlaun á hátíðinni og var það gert til að sýna baráttu kvenna innan kvikmyndageirans stuðning.

„Þetta var ákveðið af stjórn akademíunnar síðasta haust og var gert til að sýna samstöðu með baráttu kvenna um meiri vigt og sýnileika í greininni. Í kringum síðust Edduhátíð var talað um kynjahalla í kvikmyndabransanum,“ segir Brynhildur Ólafsdóttir, framkvæmdastjóri Eddunnar.

„Þetta er það sem Edduhátíðin getur lagt af mörkum. Því við getum ekki hlutast til um framleiðslu og mannaráðningar í kvikmyndum og ekki úthlutanir úr kvikmyndasjóði og heldur ekki úrslitin i Eddukosningunni sjálfri.“

Magnús var einn þeirra sem tók eftir kynjahallanum og setti inn þessa færslu á Twitter sem sjá má hér að neðan. Magnús er þó búinn að eyða færslunni út, en Vísir fékk skjáskot af tístinu sent.

Brynhildur bendir á að einstakir ráðherrar hafi ekki áskrift að veitingu verðlauna og málaflokkurinn heyri ekki bara undir menntamálaráðherra. „Hann heyrir líka undir iðnaðar- og viðskiptaráðherra. Samtök kvikmyndaframleiðenda eru í samtökum iðnaðarins. Það er ekki þannig að ráðherrann komi þessum bransa ekkert við. Þvert á móti,“ segir Brynhildur.

„Sumar hugsanir eru þannig að menn ættu ekki að hafa þær utanáliggjandi,“ segir Brynhildur.