„Stórlega vegið að almannarétti“

„Við teljum að hugmyndir um náttúrupassa og gjald inn á einstaka staði vegi að svokölluðum almannarétti sem fjallar um það að fólk geti gengið um óræktað land,“ segir GuðmundurIngi Guðbrandsson, framkvæmdastjóri Landverndar.

Landvernd, Ferðafélag Íslands, Ferðaklúbburinn 4x4, SAMÚT og Útivist gera þá kröfu að hugmynd um náttúrupassa verði betur útfærð.

Guðmundur tekur þó undir að víða þurfi að efla innviði og þjónustu til að forða ferðamannastöðum og náttúruperlum frá skemmdum og ágangi. Í þeim tilgangi sé ásættanlegt að innheimta gjald af ferðamönnum sem renni til uppbyggingar og reksturs á slíkum stöðum, þar með talið  til fræðslu, landvörslu og öryggismála.

„Í samráðshópi um náttúrupassa á vegum iðnaðar- og viðskiptaráðherra hafa útfærslur annarra hugmynda en náttúrupassans ekki fengist ræddar. Samtökin telja að fara beri leiðir sem ekki brjóta á almannaréttinum, til dæmis blandaða leið hóflegs komu- eða brottfarargjalds og breytinga á gistináttagjaldi og/eða virðisaukaskatti.“

Guðmundur segir því kröfu samtakanna skýra um að þessar leiðir verði útfærðar á sama tíma og náttúrupassinn og í kjölfarið verði endanlegar ákvarðanir teknar um leiðir til gjaldtöku ferðamanna.

„Við styðjum að sjálfsögðu uppbyggingu á þeim stöðum sem verst hafa orðið úti, en þó ekki alla. Sumir staðir myndu missa sjarma sinn og eiginleika ef þeir yrðu byggðir upp. Þar er því mikilvægt að beita öðrum aðferðum við að hefta ágang fólks á þau svæði.“  

Hann segir samtökin hafa fullan skilning á því að málið sé brýnt en hvetja ráðherra, landeigendur og aðila í ferðaþjónustunni að sameinast um að tryggja að sú mikilvæga stefnumótun sem nú er í gangi tryggi vernd almannaréttarins og að litið verði gaumgæfilega á aðferðir sem tryggja það.