Jesús á leið í verslanir

Nýr bjór, sem ber nafnið Jesús, fer í sölu í verslunum ÁTVR næsta miðvikudag. Bjórinn er 7% páska-ljósöl, léttkryddaður með kakónibbum og eikarlegið. Borg Brugghús bruggar bjórinn.

Áfengis- og tóbaksverslun ríkisins (ÁTVR) hefur ítrekað neitað að taka í sölu vörur á þeim forsendum að merkingar varanna hafi verið vafasamar vegna áletrunar þess eða umbúða.

Í reglugerð ÁTVR segir meðal annars umbúðir og áletranir megi einungis innihalda skilaboð er tengjast vörunni, gerð hennar eða eiginleikum. Eins kemur fram að ef varan særir blygðunarkennd eða brjóti á einn eða annan hátt í bága við almennt velsæmi, m.a til trúar o.s.frv.

„Þessi liður reglugerðarinnar mun líklega falla úr gildi, en málið er fyrir dómi að svo stöddu og á þeim forsendum gerðum við ekki athugasemd við nafn vörunnar,“ segir Sigrún Ósk Sigurðardóttir, aðstoðarforstjóri ÁTVR.

ÁTVR hafnaði á dögunum að taka vörur til sölu því framsetning þeirra þótti of kynferðisleg. Málið fór fyrir dómstóla og gaf EFTA-dómstóllinn út ráðgefandi álit. Niðurstaða þess máls var að ÁTVR væri óheimilt að neita selja vörur á þeim forsendum að umbúðir þeirra séu gildishlaðnar, ómálefnalegar eða brjóti í bága við almennt velsæmi.

„Þessu tiltekna ákvæði reglugerðarinnar hefur ekki verið beitt síðan í desember 2012, og munum ekki gera það fyrr en endanleg niðurstaða málsins liggur fyrir.“