Tyrknesk herflugvél á Reykjavíkurflugvelli

Herflugvél á vegum tyrkneska sjóhersins er nú stödd á Reykjavíkurflugvelli.

Vélin er af gerðinni CASA/IPTN CN-235 og eru slíkar vélar notaðar til eftirlits, leitar og björgunar á sjó, kafbátaleitar og hernaðar gegn kafbátum.

Ekki er vitað um tilgang veru hennar hér.

Vísir hafði samband við flugþjónustu Reykjavíkurflugvallar en hún neitaði að tjá sig um málið.

Talsmaður tyrkneska sjóhersins gat heldur ekki svarað spurningum Vísis.

Vera vélarinnar á vellinum gengur í berhögg við áskorun borgarráðs frá því í desember 2010 þar sem skorað var á utanríkisráðuneytið að stöðva umferð herflugvéla um Reykjavíkurflugvöll.

Borgarstjóri hefur síðar tjáð sig um vonir sínar um að gera Reykjavík að friðarborg heimsins.



Umferð herflugvéla um völlinn hefur minnkað mikið í valdatíð Jóns Gnarr en á árunum 2011 til 2012 fækkaði komum þeirra úr 54 í 21.