Jarðboranir taka þátt í fyrsta jarðvarmaverkefni Malasíu

Fyrirtækið Jarðboranir mun sjá um boranir í fyrsta jarðvarmaverkefni í sögu Malasíu þar sem reisa á þrjátíu megavatta virkjun. Baldvin Þorsteinsson, forstjóri Jarðborana, segir viðræður við malasíska fyrirtækið TGE Power á lokastigi og áætlað er að boranir hefjist í apríl.

„Verkefnið í Malasíu snýst um alhliða þjónustu á öllum þáttum borverks fyrir þennan nýja viðskiptavin, TGE Power. Vonandi verður þetta verkefni til þriggja eða fjögurra ára en maður veit aldrei fyrr en þegar búið verður að bora fyrstu holurnar,“ segir Baldvin.

Jarðboranir eru einnig með verkefni á Filippseyjum og eyjunum Dóminíku og Montserrat í Karíbahafi. Fyrirtækið skoðar nú einnig hugsanlegt verkefni í Eþíópíu í samstarfi við Reykjavík Geothermal.

„Í rauninni hefur verið mjög lítið um verkefni hér á landi frá árinu 2009. Útlitið í ár er ekkert sérstaklega gott og við höfum því þurft að leita til útlanda eftir verkefnum. Þar eru okkar tækifæri þessa stundina.“