Skyndihjálparappið vinsælast

Skyndihjálparapp Rauða krossins er vinsælast íslenskra appa. Um 20 þúsund manns hafa sótt appið frá því það fór í loftið í fyrstu viku desembermánaðar. Appið er í fimmta sæti bæði á Play Store og í App Store og er að því er fram kemur í tilkynningu frá Símanum sem er bakhjarl appsins.

„Við töldum okkur bjartsýn þegar við settum stefnuna á 16 þúsund. Við vorum samt inn við beinið að vonast til þess að ná tuttugu þúsund notendum eins og allra vinsælustu öppin hér á landi gera og það tókst,“ segir Gunnhildur Sveinsdóttir, verkefnastjóri hjá Rauða krossinum sem segir að þetta sé framúr þeirra björtustu vonum.

Ánægðust séu þau hjá Rauða krossinum þó með að vita til þess að upplýsingar fengnar úr appinu hafi nýst fólki í neyð.  Þau hafi þegar heyrt sögur þar sem appið hefur skipt máli.

Appið er frítt og Gunnhildur segir lykilinn að því að Rauði krossinngeti boðið appið frítt vera annars vegar að það sé fengið frá breska Rauða krossinum og því þurfi ekki að vinna það frá grunni. Einnig skipti máli að hafa sterkan bakhjarl eins og Símann, því það kosti sitt að staðfæra og koma appinu á framfæri.

Skyndihjálparappið hafi hvergi náð eins mikilli útbreiðslu og hér á landi að sögn Gunnhildar. „Við erum í sérflokki. Sex prósent landsmanna hafa sótt appið,“ segir hún.