App sem bjargar mannslífum

Þó smáforrit séu til margra hluta nytsamleg eru fæst þeirra hönnuð til að bjarga mannslífum. Sú var hinsvegar raunin með nýtt skyndihjálparapp sem Rauði kross Íslands kynnti til sögunnar á dögunum.

Í appinu má nálgast allar helstu upplýsingar um skyndihjálp settar fram á afar aðgengilegan hátt. Þá er auk þess hægt að prófa þekkingu sína í skyndihjálp, skoða myndbönd og ná beinu símasambandi við Neyðarlínuna.

Gunnhildur Sveinsdóttir, verkefnastjóri skyndihjálpar hjá Rauða krossi Íslands, segist vonast til að sem flestir einstaklingar sæki sér appið, sem er ókeypis.

„Allir geta veitt skyndihjálp, bæði börn og fullorðnir,“ segir Gunnhildur.

Á 90 ára afmælisári Rauða krossins verður áhersla lögð á skyndihjálp, og meðal annars verður skyndihjálparmaður ársins valinn líkt og undanfarin ár. Óskað er eftir tilnefningum til verðlaunanna, en þær verða að berast Rauða krossinum fyrir 19. janúar næstkomandi.