„Skyndihjálparappinu að þakka að ekki fór verr“

„Það er skyndihjálparappinu að þakka að ekki fór verr,“ segir Birta Marsilía Össurardóttir, 19 ára stúlka, sem nýtti sér appið þegar vinkona hennar féll niður þrjá metra og fékk alvarlegt högg á höfuðið.

Birta Marsilía var stödd á Ítalíu þar sem hún var á ráðstefnu á vegum Evrópu unga fólksins.

„Við vorum þarna nokkur saman, krakkar allstaðar að úr Evrópu. Við höfðum læst okkur úti af gistiheimilinu sem við bjuggum á.“

Ein úr hópnum ákvað að bjarga málunum og klifra yfir vegg til að komast inn á svæðið til að hleypa hinum inn. Veggurinn var með tönnum að til þess að þjófar kæmust ekki inn á svæðið að sögn Birtu. Stúlkan ætlaði að grípa í tönnina en þá brotnaði hún og stúlkan skall í jörðina. „Fallið var mjög hátt, þrír metrar og hún skall í jörðina og beint á andlitið,“ segir hún.

„Við fengum öll áfall og vissum ekkert hvað við áttum að gera, hún gat ekki talað og einhverjir stungu upp á því að við færum bara með hana til þess að leggja sig,“ segir Birta.

„Ég var að fríka út en þá mundi ég eftir appinu og sló upp hvað ætti að gera þegar manneskja fengi höfuðhögg,“ segir hún. Eftir að hafa lesið sér til á appinu vildi Birta að hringt yrði á sjúkrabíl sem varð úr.

Stúlkan var send á spítala og í ljós kom að áverkar hennar voru mjög alvarlegir. Hún þurfti að fara í margar aðgerðir vegna höfuðhöggsins.

„Ég veit ekki hvað hefði gerst ef hún hefði bara farið að leggja sig. Hún þurfti að vera mánuði lengur á Ítalíu en upphaflega stóð til vegna meiðslanna,“ segir Birta, sem þakkar skyndihjálparappinu fyrir að ekki fór verr.