54.000 krónur á skátamót

Skátar sem ætla sér á Landsmót skáta í sumar þurfa að reiða fram 54.000 fyrir innritunargjaldi á mótið.

Þetta kemur fram í frétt Akureyri vikublaðs um málið.

Landsmót skáta er haldið á víxl á Hömrum á Akureyri og við Úlfljótsvatn en í ár verður það í Eyjafirði dagana 20.-27. júlí.

Skipuleggjendur búast við um 2000 þátttakendum á mótið og því má áætla að tekjur af innritunargjöldum skátakrakkana verði rúmlega 100 milljónir króna.

Þegar 10% systkinaafsláttur er tekinn inn í myndina er ljóst að foreldrar tveggja skáta þurfa að greiða 102.600 krónur í innritunargjöld á mótið.

Frestur til að greiða gjaldið var framlengdur fram í miðjan mars en upphaflega var krafist greiðslu innritunargjaldanna fyrir 1. febrúar.

Jón Ingvar Bragason, viðburðastjóri BÍS, segir í samtali við vikublaðið að mörg skátafélög hafi staðið fyrir fjáröflunum til að standa straum af kostnaði við för á skátamótið.

Í samtali við Vísi segir skátaforingi á höfuðborgarsvæðinu að fáir kippi sér upp við gjaldið. „Enda er það svo að í því felst fullt fæði í viku, dagskrá og afnot af svæðinu að Hömrum“ segir foringinn en bendir á að skátafélög eru misdugleg við að hlaupa undir bagga með foreldrum sem senda börn sín á mótið.

„Í félaginu mínu hafa flestir skátarnir nú þegar safnað sér fyrir mótsgjaldinu og rúmlega það,“ bætti foringinn við hreykinn.