Fylltist stolti þegar hann sá vefsíðu sína í Bond-mynd

„Auðvitað er maður stoltur af þessu, sérstaklega þegar maður sá vefinn í Bond-mynd,“ segir Guðmundur R. Einarsson vefhönnuður og forritari, einn þriggja manna sem hönnuðu vef Daily Mail. Vefur breska stórblaðsins hefur fengið fjölda verðlauna og var mest sótti fréttavefur ársins 2011.

BBC fjallaði þá um hvernig „vefurinn tók yfir Bandaríkin“ og tiltekur hönnun vefsins sem mikilvægan þátt í því. „Vefurinn brýtur í raun allar reglur um vefhönnun,“ segir í greininni. Stórar myndir og langar fyrirsagnir eru líka taldar mikilvægar í þessu samhengi.

„Menn frá Daily Mail höfðu samband við samstarfsfélaga minn og við réðumst í verkið. Við unnum að gerð vefsins í eitt og hálft ár. Þetta var mikið verk. Við stýrðum hönnuninni og ég kóðaði allan vefinn,“ útskýrir Guðmundur. Þetta var ekki fyrsti fréttavefurinn sem félagarnir unnu að. „Við endurhönnuðum til dæmis vefinn fyrir CNN á sínum tíma.“

Vinnan við hönnun á Daily Mail vefnum fór fram árin 2006 og 2007. Útlitið hefur haldið sér síðan. Þetta þykir þykir frábær ending á vefhönnun. „Já, þetta gekk ótrúlega vel hjá okkur. Vefurinn virkar til dæmis mjög vel á snjallsíma og spjaldtölvum,“ útskýrir Guðmundur.

Ótrúlega mikið af hæfileikum á Íslandi

„Ég er ekkert einsdæmi. Það er ótrúlega mikið af hæfileikaríkum vefhönnuðum hér á landi. Ég vona að fólk átti sig á því hvað það eru miklir möguleikar til útflutnings í þessum geira,“ segir Guðmundur.

Fyrirtæki Guðmundar, sem nefnist WEDO, var að landa stórum samningi í Sviss og vonast til þess að geta komið fleirum í tengsl erlendis. „Við viljum vinna með sem flestum og hjálpa fólki að komast áfram. Ég var að landa samningi í Sviss og vil endilega hjálpa öðrum íslenskum fyrirtækjum að komast að. Ég er búinn að ræða við Martin Eyjólfsson, sendiherra Íslands hjá EFTA, um að koma íslensku hugviti sem víðast.“

Hann segir sköpunargáfu Íslendinga vera mikla og hún nýtist þeim í þessum geira. „Við vinnum á litlum markaði og þurfum að stökkva í allt. Það hjálpar íslenskum vefhönnuðum að skilja markaði og eykur aðlögunarhæfni þeirra.“