Gæsluvél sem leigð er til Ítalíu hefði lokið Faxaflóaleitinni á þremur tímum

Leit á borð við þá sem stóð yfir frá sunnudegi til mánudags að meintum bátsverjum í sjávarháska á Faxaflóa hefði jafnvel ekki þurft að taka nema örfáar klukkustundir - ef fullkomin leitarflugvél Landhelgisgæslunnar væri ekki í útleigu á Sikiley.

„Búnaður flugvélarinnar TF-SIF hefði gert okkur kleift að leita þetta svæði með nokkurri vissu á tveimur til þremur klukkustundum,“ segir Hrafnhildur Brynja Stefánsdóttir, upplýsingafulltrúi Landhelgisgæslunnar.

Ekki á heimleið á næstunni

Sá búnaður sem Hrafnhildur vísar til er meðal annars langdræg ratsjá, með mikla greiningarhæfni og öflug hitamyndavél.

„Ratsjáin er sérstaklega hönnuð með eftirlit á sjó í huga og getur fundið lítil endurvörp í slæmum veðrum,“ segir Hrafnhildur sem kveður TF-SIF verða erlendis í verkefnum að minnsta kosti fjóra til fimm mánuði með áhöfn.

„Hún verður meira og minna erlendis fram á haust. Leigutekjurnar skipta umtalsverðu máli fyrir rekstur LHG og styður við rekstur annarra björgunartækja, eins og þyrla hér á landi,“ segir Hrafnhildur sem aðspurð kveður ekki gert ráð fyrir mikilli notkun þessa fullkomna björgunartækis á Íslandi á þessu ári.

Fann 100 manns í Miðjarðarhafinu

Hrafnhildur segir TF-SIF vera afar fjölþætt eftirlits- og björgunartæki sem margoft hafi sannað gildi sitt. Um borð sé lykilbúnaður við leit, björgun, löggæslu sem og eftirlit. Ratsjáin hafi meðal annars nýst vel við eftirlit á Miðjarðarhafi fyrir Landamærastofnun Evrópusambandsins (EU), Frontex.

„Landhelgisgæslan kom síðast að björgunaraðgerð í desember, um 300 sjómílur suður af Sikiley, þar sem 100 sýrlenskum flóttamönnum, 80 fullorðnum og 25 börnum, var bjargað um borð í skip ítölsku strandgæslunnar eftir að áhöfn TF-SIF hafði fundið bát þeirra,“ segir Hranhildur.

Fjórir til fimm eru í áhöfn flugvélarinnar og segir Hrafnhildur þá hafa öðlast mikla hæfni við notkun búnaðarins og séu upplýsingar frá flugvélinni sendar til stjórnstöðvar Frontex í Róm þar sem fulltrúi Landhelgisgæslunnar taki þátt í samhæfingu aðgerða með öðrum viðbragðsaðilum á svæðinu.

Markaði tímamót

TF-SIF kom til Íslands á árinu 2009 og samkvæmt því sem segir á vef Landhelgisgæslunnar markaði til koma hennar tímamót í allri starfsemi Landhelgisgæslunnar „og er einfaldlega um að ræða byltingu í eftirlits-, öryggis- og björgunarmálum Íslendinga á því víðfeðma hafsvæði sem Ísland ber ábyrgð á jafn innan sem utan efnahagslögsögunnar.“

Þar segir einnig að notkunarmöguleikar flugvélarinnar til öryggis- og löggæslu, eftirlits, leitar og björgunar sem og sjúkraflugs séu „nánast ótakmarkaðir". Vélin skapi Íslendingum kost á að fylgjast með hafinu umhverfis Ísland með allt öðrum og nákvæmari hætti en verið hefur. Meðal annars býr vélin yfir öflugri infrarauðri myndavél sem bæði getur tekið myndir frá hlið og beint fram, jafnt að nóttu sem degi. Með þessari tækni er hægt að hafa yfirsýn yfir umferð og aðgerðir á hafinu sem og greina athafnir skipa með ótrúlegri nákvæmni. Einnig er vélin búin mjög öflugum 360 gráðu radar sem getur greint skip í allt að 200 sjómílna fjarlægð og tegund þeirra í 40 sjómílna fjarlægð. Þá býr vélin yfir búnaði sem greinir mengun með nýjum og nákvæmari hætti en áður sem þýðir gjörbreytingu í auðlindagæslu og umhverfisvernd.