Vísbendingar um að neyðarkallið hafi verið gabb

Ýmislegt bendir til þess að um gabb hafi verið að ræða þegar neyðarkall barst frá sökkvandi báti á Faxaflóa í gær. Þrátt fyrir ítarlega leit úr lofti og af sjó í gær, sáust engin ummerki og engan bát vantaði inn í sjálfvirkt kerfi Tilkynningaskyldunnar.

Neyðarkallið stóð í aðeins 20 sekúndur og kom ekkert fram um hvaða bátur væri að sökkva, eða hversu margir væru í áhöfn.

Þá voru leitarskilyrði með þeim hætti að menn í flotgöllum hefðu átt að finnast. Alls tóku tvær gæsluþyrlur þátt í leitinni, tvær finnskar herþyrlur, fimm björgunarskip, tíu harðbotnabátar og 190 björgunarsveitarmenn, auk lögreglumanna.

Ekki fást upplýsingar um hvort einhver sérstakur liggur undir grun, en farið verður nánar yfir málið fyrir hádegi og ákvörðun tekin um framhaldið.