Telur stýrinefnd hafa brotið lög og FME sofið á verðinum

Þorbjörn Þórðarson skrifar 6. febrúar 2014 12:19

Stýrinefnd ríkisstjórnarinnar ræddi það á fundi sínum árið 2009 hvernig best væri að komast hjá málshöfðunum sem reist væru á þeirri forsendu að ríkisvaldið hefði ekki fylgt ákvæðum neyðarlaganna. Víglundur Þorsteinsson lögfræðingur og fyrrum eigandi BM Vallár segir stýrinefndina hafa brotið lög í störfum sínum og FME hafi sofið á verðinum.

Víglundur Þorsteinsson, lögfræðingur og fyrrum eigandi BM Vallár, aflaði fundargerða stýrihópsins með úrskurði úrskurðarnefndar um upplýsingamál.

Merkileg söguleg heimild um aðgerðir eftir hrun

Fundargerðirnar sem Víglundur aflaði eru merkileg heimild því þær varpa einstöku ljósi á atburðarásina í aðdraganda þess að kröfuhafar föllnu bankanna eignuðust Arion banka og Íslandsbanka. Það tók Víglund þrjú ár að fá fundargerðirnar afhentar því embættismenn í fjármálaráðuneytinu gerðu allt til að koma í veg fyrir birtingu þeirra.

Á fundi stýrinefndarinnar frá 16. júní 2009 er rætt um hvernig eigi að afhenda kröfuhöfum bankanna eignarhluti í Arion banka og Íslandsbanka þannig að neyðarlögunum verði fylgt. Svo segir: „Unnið er að lausnum til að uppfylla kröfur um sjálfstætt mat á eignasöfnum samkvæmt neyðarlögunum." Þarna er verið vísa í mat á þeim eignasöfnum sem flutt voru yfir til Arion banka og Íslandsbanka eftir að FME tók yfir starfsemi Kaupþings og Glitnis í krafti neyðarlaganna. Verðmatið sem lagt var til grundvallar við flutning eignanna hefur alltaf verið umdeilt.

Í fundargerðinni er haft eftir Richard Brown, frá lögmannsstofunni Lovells sem ásamt lögmannsstofunni Landslögum voru helstu ráðgjafar ríkisins í málinu: Richard Brown sagði að það væri „mikilvægt að loka öllum málshöfðunarleiðum á þeirri forsendu að ríkisstjórnin væri ekki að fylgja eigin lögum eftir orðanna hljóðan,“ en þarna var hann að vísa til neyðarlaganna.

Víglundur Þorsteinsson segir að þarna séu menn beinlínis að viðurkenna á prenti að þeir hafi farið framhjá neyðarlögunum. „Ég hef aldrei séð skráð í opinbera fundargerð að mönnum sé ljóst að þeir séu að brjóta lög, en það er alveg ljóst að þeim var fulljóst hvað þeir voru að gera. Þeir voru að brjóta neyðarlögin og þeir voru að reyna að smeygja sér framhjá þeim,“ segir Víglundur.

Fundargerð ekki tæmandi

Þeir sem þekkja til málsins segja að þarna sé um misskilning að ræða eða að fundargerð sé ekki tæmandi. Aldrei hafi staðið til að fylgja ekki neyðarlögunum. Richard Brown hafi átt við að búa ætti þannig um hnútana að lögunum væri fylgt og ekki væri hægt að halda öðru fram. Ljóst er að skilja má ummælin á báða vegu.

Víglundur telur að stýrinefndin sjálf hafi brotið lög í störfum sínum með því að fylgja ekki ákvörðun Fjármálaeftirlitsins (FME) um útgáfu skuldabréfs frá nýju bönkunum til þeirra gömlu. Þannig hefði mátt koma í veg fyrir að þrotabúin eignuðust nýju bankana með húð og hári. FME hafi sofið á verðinum að þessu leyti.

Sjá má ítarlegri umfjöllun og viðtal við Víglund úr kvöldfréttum Stöðvar 2 í meðfylgjandi myndskeiði.

Mest lesið

Fleiri fréttir