Gæti haft áhrif á þúsundir lántakenda

„Þetta getur haft víðtæk áhrif, ég þekki ekki nákvæman fjölda þeirra sem tóku svona lán en held að það gæti hlaupið á þúsundum. Þarna eru miklar fjárhæðir í húfi og það er mikilvægt fyrir neytendur að athuga hvort þeirra lánssamningar eru með sambærileg ákvæði,“ segir Einar Hugi Bjarnason hæsta­réttarlögmaður og eigandi hjá Íslensku lögfræðistofunni.

Héraðsdómur ­Reykjavíkur komst að þeirri niðurstöðu í gær að ­einkaleigusamningur með kauprétti á bifreið væri í raun lánssamningur en ekki leigusamningur. Einstaklingur stefndi Lýsingu hf. og krafðist endurgreiðslu vegna ofgreiðslna og byggði kröfu sína á því að gengistrygging lánssamningsins væri ógild á sama hátt og í öðrum málum er varða kaup- og fjármögnunarleigu­samninga.

Einar Hugi, sem sótti málið fyrir hönd lántakandans, segir ekki hafa reynt á þetta samningsform fyrir dómi áður.

„Þetta var mjög algengt ­samningsform sem margir einstaklingar nýttu sér,“ segir hann.

Dómari sagði einnig að lánssamningurinn hefði verið með ólögmætri gengisviðmiðun og að fara skyldi eftir samningsvöxtum líkt og Hæstiréttur hefur áður sagt að eigi að gilda að ákveðnum skilyrðum uppfylltum.

Þór Jónsson upplýsingafulltrúi Lýsingar sagði lögmenn fyrir­tækisins vera að fara vandlega yfir niðurstöðuna áður en ákvörðun verður tekin um áfrýjun.