Þriðja serían af Sherlock fær góða dóma

Aðdáendur sjónvarpsþáttarins Sherlock hafa beðið í ofvæni eftir þriðju seríunni í á annað ár. Nú er biðinni loksins lokið.

Þættirnir fjalla um einkaspæjarann Sherlock Holmes. Benedict Cumberbatch leikur Sherlock Holmes, og Martin Freeman leikur Dr. Watson. Fyrsti þáttur í þriðju seríu var sýndur á BBC þann 1. janúar á nýja árinu. Þátturinn heitir The Empty Hearse.

Í fyrsta þættinum kemur í ljós að Sherlock Holmes er enn á lífi, eftir að hafa sviðsett dauða sinn. Besti vinur hans, Dr. Watson, vissi ekki að hann væri á lífi og hefur syrgt hann í tvö ár.

Rúmlega níu milljónir manna horfðu á fyrsta þáttinn. Annar þátturinn í seríunni var sýndur 5. janúar. Hann heitir The Sign of Three.

Þættirnir hafa verið á dagskrá Ríkisútvarpsins, en ekki er vitað hvaða sjónvarpsstöð sýnir þriðju seríuna, eða hvenær þættirnir verða sýndir á Íslandi.

Fyrsti þátturinn í nýju seríunni hefur fengið afar jákvæða gagnrýni, þátturinn fékk 9,4 í einkunn hjá IMDB og 94% áhorfenda voru ánægðir með þáttinn samkvæmt Rotten Tomatoes.