Fjölskylduhjálp Íslands býður upp á sjálfsafgreiðslu

Búið er að breyta fyrirkomulagi mataraðstoðar hjá Fjölskylduhjálp Íslands í

Reykjavík.

Þeir sem leita sér aðstoðar til samtakana velja nú sjálfir hvaða matvæli henta hverju sinni.

Í tilkynningu frá Fjölskylduhjálp segir að nú upplifi fólk sig eins og í matvöruverslun, þegar það leitar sér aðstoðar og að skjólstæðingar þeirra fagni breyttu fyrirkomulagi.

Allri aðkomu hafi verið breytt til að auðvelda einstaklingum og fjölskyldufólki heimsóknir til samtakana.

„Höfðu margir skjólstæðingar orð á því að þeir upplifðu valkvíða við frjálst val á matvælum í jákvæðri merkingu,“ segir í tilkynningunni.

Í samtali við Vísi segir Ásgerður Jóna Flosadóttir að hið nýja fyrirkomulag hafi verið hálfan mánuð í undirbúningi. Hún er ánægð með breytt fyrirkomulag sem hún segir lið í því að aflétta ölmusustimplinum af starfsemi samtakana.

„Það er enn mikið af nýju fólki að leita til okkar á öllum aldri, alveg niður í 18 ára,“ bætir Ásgerður við sem segist ekki sjá fyrir endann á þeirra þróun.