Popp tv fær andlitslyftingu

Sjónvarpsstöðin Popp tv fékk yfirhalningu á dögunum, útliti hennar var breytt og merki Popp tv líka. Stöðin verður í opinni dagskrá og einnig streymt út á netinu. „Það er margt spennandi framundan hjá okkur og við höfum lagt mikið í innlenda dagskrárgerð,“ segir Pétur Örn Valmundarson, dagskrárstjóri Popp tv.



Nýir og ferskir þættir

„Tónlist og dagskrárgerð verður bæði innlend og erlend og sniðin að ungu fólki. Við verðum með nokkra nýja þætti eins og Prófíl, Óskalög og Á bak við borðin. Geimtíví, Sjáðu og Íslenski listinn verða áfram á dagskrá.“

Öllu tjaldað til í beinni

Söngkeppni Samfés verður í beinni útsendingu frá Laugardalshöll þann 8. mars milli klukkan eitt og fjögur „Þetta verður stór og flott útsending og öllu tjaldað til. Útsendingin verður í beinni á Popp tv og á heimasíðunni okkar.“ Í vikunni á undan keppninni verða sýndir upphitunarþættir fyrir keppnina þar sem verða viðtöl við keppendur og aðstandendur.

Stöðin er stökkpallur

„Einnig má nefna að nýr sketsaþáttur, 12:00, fer í loftið um miðjan mars. Þættirnir eru gerðir af nemendum Verslunarskóla Íslands og hafa verið í gangi þar í fjölda ára en verða nú í fyrsta skipti sýndir í sjónvarpi. „Margir þekktustu skemmtikraftar Íslands stigu sín fyrstu skref á sjónvarpsstöðinni og við ætlum að halda áfram að vera stökkpallur fyrir þá sem vilja ná langt í sjónvarpi.“

Leita að sjónvarpsstjörnu

„Á næstunni munum við einmitt kynna leik sem við verðum með þar sem við munum leita að næstu sjónvarpsstjörnu. Við hvetjum því alla þá sem hafa góða hugmynd að sjónvarpsþætti að koma henni til okkar á heimasíðu stöðvarinnar, popptv.is. Það er til mikils að vinna, sigurvegararnir fá hálfa milljón króna og samning við Popp tv um að framleiða þáttinn,“ segir Pétur.

Margar góðar hugmyndir

Hann segir að nú þegar hafi stöðinni borist tölvupóstar og símtöl frá fólki sem vill koma hugmyndum sínum á framfæri. „Þetta eru snjallar og góðar hugmyndir sem fólk er að senda okkur og við erum ótrúlega ánægð með áhugann.“

Hlustað á áhorfendur



Popp tv verður aðgengilegt og virkt á samfélagsmiðlum, Facebook, Instagram, Twitter og Yevvo. „Yevvo er nýr miðill en þar getum við sent út beint þaðan sem við erum þegar við erum að gera eitthvað skemmtilegt. Við munum hlusta á áhorfendur okkar og leyfa þeim að taka þátt í því sem við erum að gera.“