„Fyrst og fremst fyrirsláttur“

„Það kom verulega á óvart að heyra af þessari svokölluðu átta ára reglu,“ segir Páll Hilmarsson bæjarfulltrúi sjálfstæðisflokksins í Garðabæ, sem hlaut ekki brautargengi við uppstillingu á framboðslista fyrir komandi kosningar.

Vissi ekki af reglunni

Ástæðan sem Páli var gefin fyrir því að hann fengi ekki sæti ofarlega á lista, eins og hann sóttist eftir, var að hann hafi verið átta ár í bæjarstjórn og að uppstillingarnefnd Sjálfstæðisflokksins í Garðabæ hafi unnið eftir þeirri reglu að enginn bæjarfulltrúi ætti að sitja lengur en tvö kjörtímabil. Páll segir regluna aldrei hafa borið á góma áður en fulltrúi nefndarinnar hafði samband við hann og bauð honum að sitja í 20. sæti listans.

„Í janúar var ég boðaður í viðtal hjá nefndinni. Þar var farið yfir minn pólitíska feril og hvað ég hefði fram að færa til bæjarbúa. Þar var aldrei minnst á þessa reglu, enda hefði ég aldrei boðið mig fram ef ég hefði vitað af þessari reglu.

Fyrst og fremst fyrirsláttur

Undir þessi orð tekur annar bæjarfulltrúi, Stefán Konráðsson, sem heyrði heldur aldrei af þessari reglu. Stefáni var boðið 21. sæti listans.

„Ég tek undir þær hugmyndir að menn eigi ekki að vera of lengi í stjórnmálum. En ef ég hefði vitað af þessari reglu hefði ég aldrei sóst eftir sæti á listanum. En ég held að þessi regla sé fyrst og fremst fyrirsláttur til að komast frá málinu,“ segir Stefán.

Sjálfstæðismenn í Garðabæ ákváðu í vetur að skipa uppstillingarnefnd í stað þess að halda prófkjör til þess að raða frambjóðendum á lista. Listinn sem uppstillingarnefnd lagði til var umdeildur. 

Uppstillingarnefnd eða prófkjör

Samkvæmt heimildum Vísis var ákvörðunin um að láta uppstillingarnefnd raða frambjóðendum á lista, í stað þess að efna til prófkjörs, nokkuð umdeild. Uppstillingarnefnd átti að líta til aldursdreifingu frambjóðenda, kynjahlutfalls og gæta þess að sjálfstæðismenn á Álftanesi ættu sína fulltrúa á listanum, en þetta verða fyrstu sveitastjórnarkosningarnar eftir sameiningu Álftaness og Garðabæjar.

Aðeins einn af núverandi bæjarfulltrúum sjálfstæðisflokksins í Garðabæ verður á listanum, fyrir utan Erling Ásgeirsson sem er í heiðurssæti. 

Bæði Stefán og Páll sitja nú í sjö manna bæjarstjórn Garðabæjar. Sjálfstæðismenn eiga fimm bæjarfulltrúa, M-listi fólksins á einn fulltrúa og Samfylking á einn.