„64 prósent kvennanna báru líkamlega áverka"

Þriðjungur kvenna innan Evrópusambandsins hefur orðið fyrir andlegu eða líkamlegu ofbeldi frá 15 ára aldri. Einni af hverjum tuttugu konum hefur verið nauðgað. Þetta kemur fram í nýrri rannsókn á tíðni kynbundins ofbeldis í Evrópusambandinu sem Mannréttindaskrifstofa ESB lét gera.

Rannsóknin er sú umfangsmesta sem gerð hefur verið og bendir til að 62 milljónir kvenna innan ESB hafi orðið fyrir ofbeldi í einhverri mynd frá 15 ára aldri.

Lægst er hlutfallið í Póllandi, um 19 prósent, en hæst í Danmörku, um 52 prósent. Fram kemur í rannsókninni að baráttufólk gegn kynbundnu ofbeldi segi að þessi gríðarlegi munur helgist líklega af misjöfnum viðhorfum til þess hvað sé ofbeldi.

Sigþrúður Guðmundsdóttir, framkvæmdastýra Kvennaathvarfins, segir að tölurnar rími við íslenskar tölur.

„Við vitum að samkvæmt nýlegri íslenskri rannsókn hafa 22 prósent kvenna á aldrinum 18-80 ára verið beittar líkamlegu og/eða kynferðislegu ofbeldi af hálfu maka eða fyrrum maka.“

„Í fyrra nefndu 51 prósent að ástæða komu væri líkamlegt ofbeldi en við nánari athugun kom þó í ljós að 64 prósent kvennanna báru líkamlega áverka eða höfðu hlotið þá af hendi maka síns."

Aðspurð hvort konur komi í Kvennaathvarfið einungis vegna andlegs ofbeldis segir Sigþrúður að dæmi séu um það. Tæp 90 prósent kvennanna hafi við komuna í Kvennaathvarfið nefnt andlegt ofbeldi.

„Ef ég mætti fylla út skýrsluna væri hlutfallið miklu hærra. Það er erfitt að ímynda sér að maki beiti líkamlegu ofbeldi en því fylgi ekki andlegt ofbeldi.“

Sigþrúður tekur undir raddir baráttufólks gegn kynbundnu ofbeldi og segir að vitundarvakning verði að eiga sér stað um hvað sé ofbeldi „Ekki mjög hár hluti kvenna svarar því til að hafa verið beittar kynferðisofbeldi því þeim hefur aldrei verið haldið föstum og nauðgað með líkamlegu ofbeldi á brútal hátt."

„Þegar við svo spyrjum um kynlífið kemur í ljós að þær hafa gert ýmislegt sem þær hafa upplifað sársaukafullt. Þær upplifa jafnvel að þær séu að koma í veg fyrir kynferðisofbeldi með viðbrögðum sínum.“

Ungar konur sækja í miklum mæli til Kvennaathvarfsins en um þriðjungur kvenna síðastliðin ár hefur verið undir þrítugu. „Undanfarin ár höfum við séð meira af mjög ungum stúlkum, um tvítugt eða yngri. Í fyrra voru 24% kvennanna að flýja kærasta eða fyrrverandi kærasta þ.e mann sem varð aldrei sambýlismaður eða eiginmaður."

„Það getur verið jákvætt að þeir urðu aldrei meira en það. En svo er hægt að hugsa þetta neikvætt. Kannski eru menn farnir að beita ofbeldi fyrr í samböndum."