Aukið jafnrétti – aukin hagsæld

Rannsóknir hafa leitt í ljós að því meira kynjajafnrétti sem ríkir innan samfélaga, því meiri er hagsældin. Um árabil hafa stofnanir Sameinuðu þjóðanna, Alþjóðabankinn og fleiri lagt mikla áherslu á að unnið sé markvisst að jafnri stöðu og jöfnum tækifærum kynjanna í menntun, atvinnulífi, stjórnmálum og einkalífi fólks. Þannig skiptir t.d. jafnrétti til náms gríðarlegu máli að ekki sé minnst á heilsugæslu sem vinnur að því að draga úr barna- og mæðradauða, afnámi ofbeldis gegn konum og þannig mætti áfram telja. Árangurinn er þó misjafn því víða er mikil andstaða við jafnrétti kynjanna og á allt of mörgum svæðum koma fátækt og átök í veg fyrir framfarir og frið.

UN Women hefur unnið að því um árabil að fá fyrirtæki um allan heim til að undirrita sáttmála þar sem þau heita því að vinna að jafnrétti kynjanna í öllu sínu starfi. Þannig snýst málið ekki aðeins um það sem gerist innan fyrirtækisins heldur einnig hvernig er unnið utan þess, að manréttindi séu virt alls staðar og allaf og að gætt sé að kynjajafnrétti í hvívetna.

Ísland hefur um árabil mælst vera það ríki í heimi þar sem kynjamismunun er hvað minnst. Það er stofnunin World Economic Forum sem mælir kynjabilið og það er afar fróðlegt að skoða skýrslurnar sem frá henni koma. Þótt gagnrýna megi suma mælikvarðana segja þeir okkur margt og mikið um stöðu kvenna í heiminum og hvaða vandamál er við að glíma. Við höfum byggt upp stofnanir eins og Jafnréttisstofu sem fylgist með því að lögum og reglum sé framfylgt eftir því sem hægt er og fjármagn leyfir. Eitt af því sem okkar jafnréttislög kveða á um eru skyldur fyrirtækja með 25 starfsmenn eða fleiri til að tryggja jafnrétti innan sinna veggja, t.d. að vinna að jafnri stöðu kynjanna meðal stjórnenda, launajafnrétti, jöfnum tækifærum til sí- og endurmenntunar og að koma í veg fyrir kynferðislega áreitni á vinnustöðum. Við búum því vel hvað varðar lög og reglur en ekki veitir af að ýta á orð og efndir. Liðsauki frá UN Women er því vel þeginn.

Landsnefnd UN Women á Íslandi hefur unnið ötullega að því að fá íslensk fyrirtæki til að undirrita fyrrnefndan sáttmála með þeim árangri að þriðjudaginn 27. maí verður efnt til ráðstefnu á Hilton Reykjavik Nordica þar sem fjallað verður um mikilvægi þess að fyrirtæki setji jafnréttismál á oddinn út frá viðskiptalegum forsendum og samfélagsábyrgð. Rætt verður um mikilvægi þess að hafa blandaðar stjórnir og stjórnendur í fyrirtækjum bæði út frá jafnréttissjónarmiðum og af þeirri einföldu ástæðu að teknar eru betri ákvarðanir fyrirtækjum til heilla. Fyrirtæki undirrita sáttmálann og hvatningarverðlaun verða veitt. Jafnréttisstofa stendur að ráðstefnunni ásamt mörgum fleiri aðilum en hún hefst kl. 9.00 og er öllum opin. Hvetjum fyrirtækin og hrósum þeim sem vel gera.