Stundakennarar íhuga vinnustöðvun

Stundakennarar við Háskóla Íslands hafa fengið nóg af langvarandi aðgerðaleysi skólans og búa sig undir aðgerðir næstu skólaönn. Þetta staðfestir Eiríkur Valdimarsson, formaður Hagstundar, hagsmunafélags stundakennara.

„Við erum að hugsa okkar gang og höfum velt fyrir okkur aðgerðum,“ segir Eiríkur og á þá við í formi vinnustöðvunar eða verkfalls. „Krafan er einföld en við viljum að komið sé fram við stundakennara líkt og aðra kennara Háskólans,“ segir Eiríkur.

Yfir 2.000 stundakennarar starfa við Háskóla Íslands. Stéttin er hins vegar ekki fastráðin og nýtur því ekki almennra réttinda á vinnumarkaði. Kennararnir hafa engan veikindarétt og búa við mjög ótraust vinnuumhverfi, þar sem þeim getur verið skipt út fyrirvaralaust.

Nemendum við Háskóla Íslands hefur fjölgað talsvert eftir hrun. Kennurum við stofnunina hefur þó ekki fjölgað í sama hlutfalli svo notast er við þjónustu stundakennara til að brúa bilið. Stundakennarar sinna nú um þriðjungi allrar kennslu við skólann. Þetta segir Eiríkur að sé ekki lengur viðunandi. „Við höfum því fengið aukna ábyrgð við kennslu og ástæða þess er í sjálfu sér einföld, við erum ódýrt vinnuafl en á sama tíma afar hæft starfsfólk og oftar en ekki einstakir sérfræðingar á þeim sviðum sem við kennum á.“

Eiríkur segir engan stuðning að finna meðal stjórnenda skólans. Málefni stundakennara hafi verið borin undir umboðsmann Alþingis fyrir rúmu ári en þaðan hafi verið lítið um viðbrögð. Nú segir Eiríkur að mælirinn sé fullur og þörfin á aðgerðum aukist dag hvern. Komi til þess að stundakennarar leggi niður vinnu sína er ljóst að það gæti haft djúpstæð áhrif á skólastarfið.

„Hvers kyns aðgerðir sem við grípum til munu koma til með að vekja mikla athygli, þar sem kennsla og yfirferð prófa fjölmargra nemenda er í okkar höndum. Stundakennarar sem eru aðeins á tímakaupi gætu hæglega hætt að kenna án nokkurra skuldbindinga. Sömuleiðis hyggjumst við jafnvel sleppa því að fara yfir próf, sleppt því að skila einkunnum. Við munum mögulega grípa til slíkra aðgerða.“