Staðan á lyflækningasviði Landspítalans sögð mjög alvarleg

Frá og með 1. október næstkomandi munu aðeins sex deildarlæknar sinna stöðugildum tuttugu og fimm lækna á lyflækningasviði Landspítalans. Staðan á spítalanum er mjög alvarleg að sögn formanns Læknafélagsins.

Á lyflækningasviði er veitt almenn og sérhæfð læknis- og hjúkrunarþjónusta en starfsemin nær til gigtsjúkdóma, hjartasjúkdóma, húð- og kynsjúkdóma, innkirtla- og efnaskiptasjúkdóma, lungna- og ofnæmissjúkdóma, krabbameins- og blóðsjúkdóma, meltingarsjúkdóma, nýrnasjúkdóma, smitsjúkdóma, taugasjúkdóma, öldrunarsjúkdóma og endurhæfingar. Ekki þarf því að fjölyrða um hversu mikilvægt sviðið er.

Mikil mannekla er á lyflækningasviði Landspítalans og nú er svo komið að frá og með næstu mánaðamótum munu aðeins sex deildarlæknar sinna stöðugildum tuttugu og sex lækna. Það jafngildir því að hver og einn læknir starfi á við rúmlega fjóra lækna.

Við skulum skoða þetta aftur. Sex deildarlæknar vinna fyrir tuttugu og fimm stöðugildi. Til að setja þetta í samhengi þá er þetta eins og að einn fréttamaður myndi vinna allar fréttirnar í fréttatímanum í kvöldfréttum Stöðvar 2. Og inni á spítalanum er góð mönnun spurning um heilsu og velferð sjúklinga. 

Staðan verður alvarlegri eftir því sem tíminn líður

Þorbjörn Jónsson er formaður Læknafélags Íslands.

Er staðan á lyflækningasviði Landspítalans alvarleg um þessar mundir? „Ég held það sé óhætt að segja að að hún sé mjög alvarleg og verður alvarlegri eftir því sem tíminn líður, ef það tekst ekki að leysa þetta,“ segir Þorbjörn. Hann segir vafasamt að halda því fram að spítalinn sé að halda uppi óskertri þjónustu á lyflækningasviði miðað við hvað manneklan er mikil.

Hvernig eiga sex eða eftir atvikum sjö deildarlæknar að sinna tuttugu og fimm stöðugildum deildarlækna? „Það er alveg augljóst að það er ekki hægt,“ segir Björn Zoëga forstjóri Landspítalans. Björn segir að vinnan hafi verið endurskipulögð og sérfræðilæknar muni eftir atvikum hlaupa í skarðið, en það leysi ekki vandann heldur aukin fjárframlög.

„Síðustu fimm ár hafa verið mjög erfið. Þegar samdrátturinn er orðinn svona mikill þá þolum við það ekki til lengri tíma. Ekki ef við ætlum að halda uppi sömu þjónustu. Upp kemur alvarleg staða og það þarf að auka peninga til spítalans,“ segir Björn.

Fáið þið einhver viðbrögð eða vísbendingar um að það verði gert frá nýrri ríkisstjórn? „Ekki ennþá.“