Ragnheiður Ösp: Erfitt að koma í veg fyrir hönnunarstuld

„Þetta er dönsk efnavöruverslun og hún selur allt sem þarf í púðann: strokkana, fyllinguna og leiðbeiningar. Það var stelpa sem hafði samband og lét mig vita af þessu. Í kjölfarið hafði ég samband við forsvarsmenn verslunarinnar en fékk mjög skrítin svör frá þeim,“ segir vöruhönnuðurinn Ragnheiður Ösp Sigurðardóttir um stuld dönsku keðjunnar Stoff & Stil á hönnun hennar, Notknot púðanum.

Aðspurð kveðst Ragnheiður Ösp lítið geta gert í málinu og það þó höfundarétturinn tilheyri henni. „Ég fékk þau svör að þau hefðu fengið þessa hugmynd árið 2011, sama ár og ég kynnti púðana á Hönnunarmars. Þeirra vara kom þó ekki í verslanir fyrr en jólin 2012 sem mér þykir skrítið. Ég gæti fengið mér lögfræðing og farið í mál en svo er spurning hvort maður hafi tíma og orku í slíkt. Þetta er stórt og rótgróið fyrirtæki og líklegt að þau geti snúið sér út úr þessu með því að gera smávægilegar breytingar á hönnuninni,“ útskýrir Ragnheiður Ösp.

Hönnuðurinn hefur lent í álíka máli áður, þá í gegnum vefverslunina Etsy. „Þar getur fólk selt eigið handverk og sumir hafa reynt að selja púða eins og mína. En aðstandendur Etsy eru mjög strangir með slíkt og hafa yfirleitt hent viðkomandi út um leið.“

Stuldur algengur

Í fyrra sagði Fréttablaðið frá því að dönsk hönnunarstofa sem nefnist Lop Furniture hafi framleitt kolla sem þóttu furðu líkir Fuzzy-kollinum sem hannaður var árið 1970 af Sigurði Má Helgasyni. Að auki hafa eftirlíkingar af Hoch die Tassen bollum Hrafnkels Birgissonar og skegghúfu Vík Prjónsdóttur skotið upp kollinum.

Spurð hvað sé til ráða segir Ragnheiður Ösp að það geti reynst litlum hönnunarfyrirtækjum erfitt að verja sig gegn stuldi því það sé einfaldlega of dýrt. „Það er hægt að kaupa einkaréttinn á vörunni, sérstaklega ef notuð er óhefðbundin aðferð við framleiðslu hennar, en það kostar einhverjar hundrað þúsund krónur og nýjir hönnuðir eiga erfitt með að reiða slíka upphæð af hendi,“ segir hún að lokum.