Styrkja RIFF um níu milljónir

Menningar- og ferðamálaráð hefur samþykkt að styrkja Alþjóðlegu kvikmyndahátíðina í Reykjavík (RIFF) áfram. Ráðið samþykkti á fundi sínum að styrkja hátíðina um níu milljónir króna til eins árs.

Það er skemmri tími en áður hefur verið. Nokkur titringur hefur verið í kringum hátíðina en gerðar voru athugasemdir við stjórnarfyrirkomulag og starfsmannastefnu fyrirtækisins. Þetta kom meðal annars fram í minnisblaði nefndarinnar sem hefur ekki verið gert opinbert.

Einar Örni Benediktsson, formaður Menningar- og ferðamálaráðs, segir í samtali við Vísi að RIFF hafi farið eftir þeim athugasemdum sem voru gerðar, meðal annars með því að skipa stjórn RIFF, sem var ekki áður.

„Það er ekkert óeðlilegt að við stöldrum aðeins við og skoðum þá sem við erum að styrkja," segir Einar Örn en hátíðin verður haldin í tíunda sinn næsta vetur. Einar Örn bendir á að hátíðin sé skuldlaus. Hann segir endurskoðunina nú frekar hluta af sífelldri endurskoðun á því hvernig fjármunum borgarinnar sé varið.

Spurður hvort breytingar eða athugasemdir borgarinnar munu fela í sér einhverjar mannabreytingar hjá RIFF svarar Einar því til að borgin hafi ekki slíkt vald. Það sé ekki borgarinnar að hlutast til um sérstaka starfsmenn hjá styrkþegum borgarinnar.

„Kvikmyndahátíðin er mjög góð, en það þarf að eiga svona lifandi samtal við þá sem fá styrki frá borginni," segir Einar Örn. Spurður hvort það væri ekki eðlilegt að útsvarsgreiðendur fengu að aðgang að hinu leynilega minnisblaði, svarar Einar Örn því að minnisblöð verði oft til á fundum sem þessum, og þar séu eingöngu punktar fyrir nefndarmenn og þá sem að málinu koma.

Spurður hvort hann sé sáttur við niðurstöðu mála, og að hátíðin verði styrkt áfram, svara Einar: „Ég er sáttur við þær breytingar sem hafa verið grðar og tillögur stjórnar RIFF."

Marta Guðjónsdóttir, nefndarmaður í Menningar- og ferðamálanefnd á vegum Sjálfstæðisflokksins, segir að það skipti mestu að það hafi verið skipuð eftirlitsnefnd sem fór yfir reksturinn í samstarfi við RIFF en þær athuganir leiddu í ljós að hátíðin er skuldlaus.

„Og það hafa verið gerðar þær úrbætur sem við fórum fram á eins og að skipa stjórn með hæfu fólki, fagfólki á sínu sviði. Og við treystum þessu fólki," segir Marta, en einhugur var um að styrkja RIFF hjá nefndinni