Hvetja fólk til að setja ICE fyrir framan nánasta ættingja

„Það hefur komið fyrir að við höfum getað nýtt okkur þetta, en það eru ekki mörg tilvik," segir Jón Viðar Matthíasson, slökkviliðsstjóri á höfuðborgarsvæðinu. Í gær deildu margir skilaboðum frá sjúkraflutningamönnum á Facebook þar sem fólk var hvatt til að skrifa ICE fyrir framan nánasta ættingjann sinn í símaskránni í símanum sínum. Ef viðkomandi myndi lenda í slysi væri hægt að hafa upp á ættingjanum strax.

Jón Viðar segir að þetta sé þekkt víða um heim. „Þetta hefur hinsvegar aldrei farið á flug vegna þess að nú eru flestir snjallsímar læstir. Símarnir eru læstir út af öðrum ástæðum, til dæmis ef þú týnir símanum viltu ekki að hver sem er geti skoðað hann," segir hann.

ICE stendur fyrir In Case of Emergency, sem á íslensku myndi útleggjast sem "Í neyðartilvikum". „Það er svo sem allt í lagi að fólk geri þetta, ef það hefur áhuga á því. Þetta er eitt verkfæri fyrir okkur að nota," segir Jón Viðar.

Skilaboðin sem birtust á Facebook-síðu lögreglunnar á Suðurnesjum.