Aðalmeðferð í stærsta dómsmálinu um miðjan apríl

Aðalmeðferð í Al-thani málinu verður þann 11. og 19. apríl næstkomandi, samkvæmt dagskrá Héraðsdóms Reykjavíkur. Alþingiskosningarnar fara fram 27. apríl, um viku eftir aðalmeðferðina.

Þó að aðalmeðferðin sé einungis skráð þessa tvo daga, er mjög líklegt að hún dragist eitthvað á langinn því sérstakur saksóknari gerir ráð fyrir því að um 50 vitni komi fyrir dóminn. Til samanburðar komu 40 vitni fyrir landsdóm, og aðalmeðferðin í því máli tók um tvær vikur.

Málið snýst um markaðsmisnotkun og umboðssvik sem helstu stjórnendur Kaupþings eru grunaðir um að hafa staðið að. Þeir Sigurður Einarsson, fyrrverandi stjórnarformaður, Hreiðar Már Sigurðsson, fyrrverandi forstjóri, Magnús Guðmundsson, fyrrverandi forstjóri Kaupþings í Lúxemborg, og Ólafur Ólafsson, einn aðaleigandi bankans, eru grunaðir um að hafa staðið að sýndarviðskiptum með því að hafa selt 5% í Kaupþingi til al-Thanis.

Aldrei hafi komið nein greiðsla frá al-Thani vegna kaupanna heldur hafi bréfin verið seld með láni frá bankanum sjálfum. Með þessu hafi átti að halda hlutabréfaverði bankans uppi og villandi markaðsupplýsingar verið gefnar í fjölmiðlum.

Al-Thani málið verður stærsta dómsmálið, sem höfðað er í framhaldi af bankahruninu, hvað varðar fjölda vitna.